Henanadai

◼ Bema ruma tauna ia gwau ia ura lasi gabeai Iehova ena Witness taudia be iena ruma dekenai do idia mai haroro totona, dahaka do oi karaia?

Bema iduara dekenai hereva ta ia noho, ia gwau idia ura lasi tomadiho orea eiava Iehova ena Witness taudia idia mai, namona be unai ruma tauna ena ura ita matauraia, unai iduara dekenai do ita pidipidi lasi.

Nega haida iduara dekenai hereva ta ia noho, ia gwau ruma taudia idia ura lasi hoihoi taudia eiava moni idia noinoilaia taudia idia mai. Ita be davana lasi tomadiho gaukarana ita karaia dainai, unai hereva ese ita ia gwauraia lasi. Unai dainai unai iduara dekenai do ita pidipidi be maoro. Bema ruma tauna ia badu, mai iseda hemataurai danu do ita hamaoroa dahaka dainai ita laloa unai hereva be ita dekenai ia maoro lasi. Bema ruma tauna ia gwau unai hereva be Iehova ena Witness taudia totona idia atoa danu, vadaeni iena ura ita badinaia bona gabeai iena ruma do ita hanaia.

Nega haida, ta ena ruma dekenai ita mai neganai, ruma tauna ia badu bona ia gwaugwau, ia gwau do ita giroa lou lasi. Vadaeni iena ura do ita matauraia be namo. Ta ese unai bamona ia hereva neganai, namona be pepa ta dekenai ita torea, ruma ena namba bona deit danu, bona teritori mapu ena envelope lalonai do ita atoa. Gabeai, pablisa taudia be unai teritori dekenai do idia haroro neganai, unai ruma do idia hanaia.

To, inai ita laloatao, unai ruma ita hanaidia karana be mai ena dokona. Hari idia noho taudia be reana gabeai ruma amo do idia siri. Reana gabeai unai ruma dekenai ma tau ta do ita davaria bona reana ia ura kamonai. Danu, reana guna ia ura lasi tauna be gabeai ena lalona do ia haidaua bona hari ia ura ita mai. Vadaeni, nega sisina ia lao murinai, namona be mai hemataurai danu unai bamona ruma taudia edia lalohadai ma ita tahua lou.

Lagani ta ia ore murinai, namona be teritori ena faila do idia sekea, bona idia ura lasi ita mai taudia edia lisi do idia torea. Haroro naria tauna ena hereva hegeregerena ai, mai edia hemataurai bona idia manada pablisa taudia be unai ruma dekenai do idia lao. Unai ruma taudia do idia hamaorodia idia mai ena badina be idia ura diba, guna unai ruma dekenai idia noho eiava harihari sibona idia noholaia. Namona be pablisa tauna be Buka Helaga Herevalaia buka ena rau 17-24 ena hereva ia diba, ena ladana be “Ura Lasi Herevadia Haerelaidia Daladia.” Bema edia toana be idia badu lasi, vadaeni tadikaka be vaia edia kara unai ruma dekenai do idia giroa lao diba. To bema ruma tauna ia badu noho, iena ruma dekenai do idia giroa lao lasi ela bona lagani ma ta ia ore. Bema kara idauna ta do idia karaia be namo, kongregesen ena elda edia orea taudia edia hereva hegeregerena do ita badinaia.

[Questions]

1. Ita haroro neganai, bema iduara dekenai hereva ta ia gwau idia ura lasi Iehova ena Witness taudia idia mai, dahaka do ita karaia?

2. Bema iduara dekenai hereva ta ia gwau idia ura lasi hoihoi taudia eiava moni idia noinoilaia taudia idia mai, dahaka do ita karaia?

3. Bema ruma dekenai ita ginidae neganai, ruma tauna ia badu dikadika bona ia gwau ia ura lasi ita giroa lou, dahaka do ita karaia?

4. Bema ruma tauna ia gwau ia ura lasi Witness taudia idia giroa lao, edena negai do ita giroa lao diba? Dahaka dainai?

5. (a) Bema ruma tauna ia gwau ia ura lasi Witness taudia idia mai, kongregesen be dahaka ia karaia unai ruma dekenai idia giroa lao totona? (b) Idia badu noho neganai, edena negai do idia lou henidia diba?

This is a repeat of article in km 2/94 taken from km-E 6/94 “Question Box.”