Magasin Haroro Gaukarana
1 Haroro gaukara dekenai, Iehova ena Witness taudia ese idia gaukaralaia magasin rua, Gima Kohorona bona Noga!, edia heduru be bada. Tanobada ena magasin idauidau be tausen momo bona hereva idauidau momo idia sivarailaia, to magasin rua sibona be dina vaira totona Dirava ena Basileia ena helaro idia gwauraia hedinarai. Unai dainai momo herea ita hariharilaidia be namo, ani?
2 Pura ta ta iboudiai magasin oi hariharilaidia, a? Kara ginigunana be magasin matamatadia idia mai neganai, oi duahidia bona oi abia dae momokani, bema taunimanima idia ura Dirava ena gwaumaoro do idia abia idia mauri noho totona, idia lalodiai idia noho sivaraidia be mai anina bada. Bema unai bamona oi laloa, do ia hedinarai mai moale danu magasin oi hariharilaidia neganai.
3 Dala Idauidau Oi Gaukaralaidia: Namona be oi gima noho nega idauidau ai magasin do oi hariharilaidia totona. Magasin ma haida do oi hariharilaidia totona namona be henunai ai torea daladia oi laloa.
4 Ruma-ta-Ruma-ta Dekenai: Emu sediual dekenai, pura ta ta iboudiai dina ta oi abia hidi magasin gaukara do oi karaia totona, a? Namona be oi hegaegae namonamo guna, bona mai moale danu kiki hereva kwadogina amo magasin ena sivarai tamona oi gwauraia hedinarai. Mai goada danu oi hereva! Reana inai bamona oi hereva diba: “Inai sivarai be namo herea, lau ura oi duahia. Lau ura inai magasin rua oi dekenai lau rakatanidia, edia davana be 50 toea.”
5 Dala Dekenai Haroro Gaukarana: Oiemu sediual dekenai, pura ta ta iboudiai, ena be nega kwadogina sibona oi karaia diba, to dala dekenai oi gini haroro totona be namo. Namona be taunimanima idia mai neganai oi hereva henidia. Namona be haroro gaukara naria tauna ia hegaegae bena tadikaka bona taihu ia durudia unai gaukara do idia karaia totona.
6 Sitoa-ta-Sitoa-ta Dekenai: Namona be haroro gaukara naria tauna ena hakaua dalana henunai ia gaukara hesiai tauna ia hegaegae, bisinesi rumadia dekenai magasin gaukara do idia karaia loulou totona. Faktori, bensini abia gabudia, hotel, bona unai bamona bisinesi gabu ma haida be iseda haroro teritori danu.
7 Magasin Daladia: Ena be ruma ta ruma ta ai eiava bisinesi teritori dekenai magasin ita hariharilaidia, to namona be idia dekenai ita giroa loulou, magasin dala do ita hamatamaia totona. Bema iseda Baibel stadi taudia be sabskripsen idia abia lasi, magasin matamata iboudiai idia abia be namo.
8 Turadia Bona Varavara Taudia: Magasin matamatadia idia mai neganai, oi duahidia bona emu varavara taudia eiava turadia be edena sivarai do idia ura duahia oi laloa hegaegae, a? Reana oi diba Noga! magasin ena sivarai haida do idia ura duahia.
9 Nega Idaudia Bona Gabu Idaudia Dekenai Haroro Gaukarana: Magasin lalodiai hereva idauidau idia sivarailaidia, bona idia be namo herea gaukara gabuna ai, sikuli ai, PMV guia neganai, eiava hebouhebou ai oi lao henia neganai, oi hariharilaidia totona. Namona be hanaihanai oi dekenai magasin idia noho oi hariharilaidia diba totona.
10 Namona be haroro naria tauna be magasin matamatadia iboudiai edia hereva ia duahidia, bena ia diba edena sivarai be namo hanua ena bisinesi taudia eiava orea taudia ma haida totona. Tadikaka haida do idia abidia hidi unai taudia do idia vadivadi henidia totona, bona hereva kwadogina amo idia ta ta dekenai do idia ura henia sivarai be magasin lalona amo do idia hahedinaraia.
11 Tadikaka momo idia gwau heduru gauna be hua ta ta iboudiai magasin hida idia ura hariharilaidia idia gwauraia, unai namba idia tahua totona. Namona be oi gwauraia namba be oi davaria diba gauna. Pioneer taudia idia hagoadaia unai idia karaia totona, bona hua ta ta iboudiai lalodiai, magasin hida idia hariharilaidia idia sekea, bena idia diba hida idia henia vadaeni. Ita hariharilaia magasin ta ta iboudiai be mai edia siahu, duahia taudia idia durudia mauri dalana dekenai idia raka totona.
This article is unique to PNG.