Ma Haida Durudia Iseda Havaraia Diravana Idia Hanamoa Totona
1 Salamo torea tauna ia gwau: “Iehova e, . . . oi dekenai mauri ena badina ia noho.” Ita be unai bamona ita laloa danu, a? (Sal. 36:5, 9) Edena bamona ita ese taunimanima ma haida do ita durudia bena idia diba Iehova be iseda Havaraia Diravana dainai, do idia moalelaia bona ena ladana do idia hanamoa be namo? Namona be June ena hua lalonai, Buka Helaga—Dirava ena Hereva Eiava Taunimanima Edia? bukana, idia dekenai ita hariharilaia. Unai buka ena hereva ese ia durudia bena Baibel be Dirava ena Hereva do idia abidadama henia diba. Oibe, ita ura taunimanima iboudiai be Iehova Dirava idia hanamoa, bona Iena Hereva bona gwauhamata idia matauraidia.
2 Auka lasi kiki hereva namona ta be inai.
Ruma tauna oi hanamoa murinai, rau 11 bona 14 edia laulau oi hahedinaraia, bena oi henanadai, oi gwau:
◼ “Baibel be edena bamona idia torea? Haida idia gwau ia be taunimanima edia toretore. To Baibel ia gwau Dirava ese mai edia abidadama taudia ia hasiahudia dainai, hereva idia torea bona Baibel bukabuka momo idia toredia, taunimanima iboudiai be ena sivarai do idia diba totona. Unai dainai, ia be Dirava ena Hereva. Dahaka oi laloa? [Naria do ia haere totona.] Oibe, Baibel be Dirava ena Hereva bona ia be mai anina bada oiemu mauri lalonai be inai buka ese ia hamomokania. Lau ura oi abia, bona ia hahedinaraia hereva iboudiai oi duahia murinai, do oi diba unai be momokani eiava lasi.”
3 Eiava inai bamona oi hereva diba:
◼ “Hari inai tanobada lalonai, taunimanima momo edia abidadama Dirava dekenai ia maragi ia lao, memero kekeni momo be unai bamona. Dina ta ta iboudiai edia lalo-hekwarahi gaudia dainai idia lalohisihisi. Oi laloa Baibel ena hereva ese taunimanima ia durudia diba edia hekwakwanai idia hanaia totona, a? [Naria do ia haere totona.] Namona be Baibel ena hereva oi itaia. [Salamo 55:22 oi duahia bona dina vaira totona Dirava ena gwauhamata herevana be dahaka oi gwauraia hedinarai, reana Salamo 37:10, 11 eiava 2 Petero 3:13 oi duahia diba danu.] Lau diba inai buka namona ena hereva do oi moalelaia, badina hari ita kikilaia sivaraina ena hereva ma haida ia gwauraia bona ia hamomokania danu.” Buka oi henia toho.
4 Eiava ruma tauna oi hanamoa murinai, inai bamona oi hereva diba:
◼ “Taunimanima haida idia laloa Baibel be idaunegai idia torea dainai, ena hereva be hari inai uru taudia ia durudia diba lasi. Dahaka oi laloa? Oi laloa hari inai negai, Baibel ena hereva be ia namo taunimanima ia hakaudia totona, a? [Naria do ia haere totona.] Namona be inai oi laloa, Baibel lalonai, peroveta hereva momo be mai anina hari inai nega lalonai, bona Baibel torea taudia ese idia hahedinaraia goevagoeva, bema unai peroveta hereva hegeregerena ita karaia, ita mauri noho diba. [Namona be 1 Korinto 10:11 bona 2 Petero 1:20, 21 oi duahidia.] Inai buka ese oi ia durua diba bena Baibel amo do oi diba dahaka do oi karaia Dirava ena ura oi badinaia totona, bona unai amo mauri hanaihanai do oi abia.”
5 Karaia dalana ma ta be buka ena rau 4 laulauna oi hahedinaraia bona oi gwau:
◼ “Taunimanima ai vadivadi henidia ena badina be ai ura ai hagoadadia Baibel do idia duahia totona. [Bena rau 5 ena sinado, ‘Baibel Duahia ena Namo be Dahaka?’ henunai ia noho herevadia oi duahia.] Oi itaia, inai henanadai ia gwauraia, ‘Oi laloa inai hekwakwanai do idia haoredia diba, a?’ Dahaka oi laloa? [Naria do ia haere totona.] Lau ura inai buka do oi abia, badina oi ia durua diba Dirava ena Hereva oi moalelaia totona bona Iena aonega sisiba herevana bema oi badinaia, namo bada do oi davaria diba.”
6 Oi ura momokani taunimanima ma haida oi durudia iseda Havaraia Diravana ena hereva momokanidia, bona iena ura ia lalokau henia taudia dekenai do idia diba totona, a? Buka Helaga—Dirava ena Hereva Eiava Taunimanima Edia? bukana ese oi ia durua diba unai oi karaia totona. Unai buka ena hereva ese iseda Havaraia Diravana, Atai Herea Lohiabada Iehova, ia hanamoa, badina iena kara edia namo bona iena ura namona ia hahedinaraia, iena ura be sibona ena ladana do ia hahelagaia bona Keriso ena Basileia amo taunimanima do ia hanamodia.