Ruma-ta-Ruma-ta Haroro Gaukara Karaia Noho
1 Idaunegai Israel lalonai, dina ta ta iboudiai boubou gaudia idia henia. (Eso. 29:38-42) Boubou patana ena lahi ia araia noho; ia daekau kwalahuna be Iehova ia hamoalea “bonana namo gauna.” (Eso. 29:18) Hari inai negai, ita idia hagoadaia “nega iboudiai Dirava dekenai hahenamo ita henia boubou gauna ta bamona, anina be udu bibina ena huahua amo taunimanima vairanai iena ladana ita hanamoa.” (Heb. 13:15, NW) Hari inai negai, Taravatu ia gwauraia hegeregerena boubou gaudia ita henia lasi, to hanaihanai Iehova ena hahenamo ita gwauraia hedinarai karana amo ita tomadiho henia.—Isa. 43:21; Kara 5:42.
2 Iesu Keriso, inai tanobada dekenai ia noho taudia iboudiai amo haroro tauna hereadaena, ese ita ia hadibaia tomadiho dala momokanina be iseda udu bibinadia amo Iehova ena ladana ita hanamoa be gau badana. Iena hahediba taudia ia hadibadia sivarai namona idia harorolaia haraga be gau badana. Ia diba taunimanima be sivarai namona idia kamonai totona dala hereadaena be edia ruma dekenai idia harorolaia. (Mat. 10:7, 12) Vadaeni, ita itaia aposetolo taudia ese iena hereva idia badinaia ia be Dirava ena amo dainai, bona ruma ta ruma ta dekenai idia haroro.—Kara 20:20.
3 Hari inai negai danu unai bamona. Ita be Iesu ena hahediba taudia dainai, Iesu ita tohotohoa bona ruma ta ruma ta dekenai sivarai namona ita harorolaia. Ena be unai ita karaia dainai reana taunimanima haida ese ita idia maumauraia eiava ita idia dagedage henia, to taunimanima milion momo ese hereva momokani idia dibaia, bona lagani ta ta iboudiai hahediba taudia matamatadia handred tausen momo be hutuma bada herea oreana dekenai idia vareai, bona unai ese ia hahedinaraia Iehova be unai dala amo iena ura ia hagugurua. Unai dainai, iseda haroro gaukara ita do haheaukalaia noho.
4 Ruma-ta-Ruma-ta Haroro Gaukara amo Idia Vara Hahenamodia: “Dirava ese taunimanima edia toana ia laloa lasi. To . . . Dirava dekenai ia gari bona kara maoromaoro ia karaia tauna, Dirava ese do ia abia dae.” (Kara 10:34, 35) Iseda teritori lalonai, ruma ta ta iboudiai dekenai ita lao ese ia hahedinaraia taunimanima edia toana ita laloa lasi, to ita ura taunimanima iboudiai be Basileia ena sivarai do idia kamonai loulou. Danu, unai neganai, kamonai taudia be sibona sibona ita durudia diba.
5 Pablisa kahirakahira iboudiai, natudia, burukadia, bona vareai matamata taudia danu, be ruma-ta-ruma-ta gaukara idia karaia diba. Unai dala amo ta ta iboudiai be ‘edia uduna dekena amo idia gwauraia hedinarai, mauri do idia davaria totona.’ (Roma 10:10) Ruma-ta-ruma-ta gaukara be ma haida danu ita karaia neganai, unai ese lalokau bona lalo-tamona dekenai ita ia hatamonaia. Haroro gaukara ita karaia neganai, bema taunimanima be ita dekenai idia maumau eiava ita idia dagedage henia, haheauka karana ita hahedinaraia diba. Iseda abidadama ita hahedinaraia neganai, taunimanima “ibounai edia matana dekenai” idia itaia, bona unai ese kudou-maoro taudia ia durudia bena idia lalo-parara ita dekenai Baibel hadibaia dalana ia noho bona unai amo namo do idia davaria diba. (1 Kor. 4:9) Ia hedinarai goevagoeva Iehova ese ruma-ta-ruma-ta gaukarana ia hanamoa bona unai gaukara amo hutuma bada herea taudia be iena tomadiho goevadaena ena “dubu” dekenai ia haboudia.—Isa. 2:2-4.
6 Guna sibona lasi, to hari inai negai ia momokani, taunimanima be Basileia ena sivarai do idia kamonai be gau badana. Unai dainai namo lasi ita hesiku, to ruma ta ruma ta dekenai ita haroro ela bona Iehova ia gwau, vadaeni. (Isa. 6:11) Unai bamona ita karaia neganai, do ita davaria hahenamo be inai: hari inai nega dokona lalonai, mai anina bada bona namo bada ia havaraia ruma-ta-ruma-ta haroro gaukarana do ita moalelaia diba.—1 Kor. 15:58.
[Questions]
1. Hari inai negai, Iehova dekenai boubou gaudia ita henia ena dala be dahaka?
2. Taunimanima be sivarai namona do idia kamonai totona, Iesu ese ia hahedinaraia haroro dala hereadaena be dahaka?
3. Dahaka ese ia hahedinaraia Iehova ese ruma-ta-ruma-ta haroro gaukarana ia hanamoa?
4. Ruma-ta-ruma-ta gaukara lalonai edena bamona ita hahedinaraia taunimanima edia toana ita laloa lasi?
5. Ruma-ta-ruma-ta haroro gaukara amo taunimanima dekenai bona ita dekenai danu, dahaka namo ita davaria?
6. Dahaka dainai ita hesiku lasi, to ruma-ta-ruma-ta haroro gaukara do ita karaia noho be gau badana?