Ma Haida Durudia Hereva Momokani Idia Diba Totona
1 Iesu be tanobada dekenai ia diho mai hereva momokani do ia gwauraia hedinarai totona. Taunimanima be hereva momokani do idia diba totona, ia ese iena hahediba taudia ia durudia hadibaia taudia ai do idia lao totona. Ia diba taunimanima hadibadia gaukarana dekenai do idia kwalimu, unai dainai idia ia gwauraidia ‘hadibaia taudia.’ (Mat. 13:52) Ia gwau idia ta ta iboudiai be aonega tauna ta bamona, ena kohu momo dekena amo kohu ia kokia diba. Hari inai negai, Iesu ena hahediba taudia ese Basileia harorolaia gaukarana idia ha-haragaia totona, idia ese idia printaia buka bona magasin idia gaukaralaidia. Hegeregere, kongregesen momo lalodiai buklet idauidau idia noho, bona unai amo taunimanima idia durudia hahediba taudia ai do idia lao totona. Unai heduru gaudia namodia be edena bamona ita gaukaralaidia diba?
2 “Noho Namona—Oi Davaria Diba” buklet maragina hariharilaia totona, hereva hamatamaia totona reana inai henanadai oi henia diba:
◼ “Ena be taunimanima idia hekwarahi bada namo havaraia totona, to momo idia laloa vaira dinadia dekenai namo do ia vara lasi. Dahaka oi laloa? [Naria do ia haere totona.] Baibel ese edia hekwarahi idauidau amo idia kwalimu lasi ena badina ia hahedinaraia.” Salamo 146:3, 4 oi duahia. Ruma tauna ida paragraf 6 ena hereva umui kikilaia murinai, reana inai henanadai oi henia diba: “Daika sibona ese noho namona ita ia henia diba?” Ruma tauna ena haere hegeregerena, namona be paragraf 7 amo hereva haida umui kikilaia, eiava nega oi hegaegaelaia, gabeai oi giroa mai unai hereva do umui kikilaia totona.
3 “Dirava ese Ita Ia Laloa, Eiava Lasi?” buklet maragina ita gaukaralaia dalana ta be inai:
◼ “Taunimanima momo be inai laulau henunai idia noho henanadai idia gwauraia. [Rau 6 bona 7 henunai ia noho henanadai oi duahidia, bona naria ena lalohadai do ia gwauraia totona.] Bema ita gwau mai ena lalokau Diravana be gau namodia ia havaraia murinai gau dikadia ia havaraia, unai be maoro lasi, unai dainai iena gwauhamata herevana Isaia 65:21-24 dekenai oiemu lalohadai be dahaka?” Ia haere neganai bema oi laloa ia ura kamonai noho, namona be buklet oi kehoa lao paragraf 37 dekenai, bona Dirava ena Basileia ese dahaka do ia havaraia oi gwauraia hedinarai.
4 “Oi Emu Mauri Oi Hanamoa Diba!” buklet maragina oi hariharilaia neganai, reana inai bamona oi hereva diba:
◼ “Taunimanima momo be idia moale lasi, bona edia gaukara metauna dainai edia mauri idia hesikulaia. Mauri hanamoa dalana be dahaka, mani oiemu lalohadai oi gwauraia? [Naria ruma tauna ia haere totona.] Baibel ese ia hahedinaraia Dirava ese ita totona gau namodia ia hegaegaelaidia. Iena hereva Apokalupo 21:4, 5 dekenai mani oi itaia.” Bema ia ura kamonai noho, namona be buklet ena paragraf 42 amo hereva ma haida umui kikilaia.
5 “Mauri Hanaihanai Tanobada Dekenai Oi Abia!” buklet badana ia gaukaralaia neganai, mero eiava kekeni be inai henanadai ia gwauraia diba:
◼ “Oi ura inai bamona tanobada paradaisona lalonai oi noho, a? [Buklet ena vairana bona murina laulaudia oi hahedinaraidia, bona naria do ia haere totona.] Lau bona egu ruma bese taudia ai naria noho unai bamona gabu dekenai do ai noho totona, badina Baibel ena hereva Ioane 17:3 dekenai inai bamona ia hereva.” Unai siri oi duahia murinai bema oi itaia ia ura kamonai noho, unai buklet oi henia toho do ia duahia totona.
6 Bema hari hua lalonai buklet ma haida do oi gaukaralaidia, emu hamatamaia herevana bona kiki herevana be atai dekenai ai torea heduru herevadia bamona oi gaukaralaidia diba. Laloaboio lasi, ruma taudia edia lalona veria totona, namona be hereva kwadogi bona hagoadaia herevadia oi gwauraidia.
7 Iehova ese hereva momokani ita ia henia. Unai dainai, namona be nega ibounai dala ita tahua taunimanima dekenai ita gwauraia hedinarai totona, unai anina be taunimanima dekenai iseda orea idia printaia gaudia ita henia eiava iseda uduna amo ita hereva henidia. Unai dala amo ita hahedinaraia taunimanima ese namo ela bona hanaihanai do idia abia totona ita be hadibaia taudia.—Mat. 28:19, 20.