Sikuli Dekenai Idia Lao Lou
1 February lalonai, iseda matamata taudia be sikuli ena lagani matamatana do idia karaia hamatamaia. Moale idia havaraia gaudia idia laloa, to gari idia havaraia diba gaudia haida idia laloa danu. Memero kekeni momo be tisa idaudia dekenai do idia siaia lao, kosi matamatadia do idia abia, bona idia diba lasi stiuden taudia danu do idia sikuli hebou. Iseda matamata taudia edia ura be sikuli naria taudia bona stiuden taudia danu idia gaukara hebou namonamo, to namona be idia laloaboio lasi, lauma dalanai dika idia havaraia gaudia dekenai idia gima noho be gau badana.—1 Kor. 15:33.
2 Witness memero kekeni idia laloa bada gauna be idia ura tanobada ena lauma mirona idia dadaraia, hari tano momo edia sikuli gabudia ia hahonua gauna unai. Mai gari lasi ida, Keristen taudia matamatadia bona burukadia ese hari tanobada ese idia abia isi kara bona laloa daladia idia dadaraia, bona Iehova ena Hereva tahua bona badinaia karana amo idia ‘gima noho’ be gau badadia. (Sal. 119:9) Namona be unai idia laloa tama bona sina be sikuli dekenai dahaka idia hadibalaia idia diba, edia natudia idia hakaua namonamo totona. Bema sikuli o ma gabu ta dekenai idia hadibaia gaudia be Iehova ena hesiai taudia edia helaga bona goeva karadia hegeregerena lasi, ita dadaraia be gau badana.—1 Pet. 1:15, 16.
3 Nega momo, bese abia isi o holide karadia, spot gadara, eiava moale karadia be ita abidadama henia hahediba herevadia hegeregerena lasi. Unai gau idauidau dekenai Sikuli bona Iehova ena Witness Taudia buklet ese Keristen matamata taudia ia durudia. Natu maragidia edia tama bona sina be tisa dekenai unai buklet idia abia lao neganai, hekwakwanai idia havaraia diba gaudia idia hanaia eiava idia hamaragia diba. Unai buklet ese tisa do ia durua Iehova ena Witness taudia be kara haida lalonai idia vareai lasi ena badina ia lalo-pararalaia totona, idia herevalaia diba. Tisa be diba ia abia neganai, gaukara hebou namonamo mamina ia vara diba.
4 Ma danu, namona be gabu tamona ai, edia sikuli buka idauidau ida, Keristen stiuden taudia be sibodia edia Sikuli buklet idia atoa. Nega momo ma stiuden haida be ita abidadama henia gaudia idia nanadailaia neganai idia haroro henidia diba. Danu, namona be Witness natudia be nega iboudiai edia Advance Medical Directive/Release kadi eiava Identity Card idia huaia loaloa. Ia be matamata gauna bona dala maorona ai idia sainia be gau badana. Inai hahegani herevadia idia badinaia taudia be ‘dika ia itaia bena ia sibona ia hunia tauna’ bamona.—Her. 22:3.