Haroro Gaukara—Hahenamo Badana Ta
1 Sivarai namona harorolaia be Iehova ese ia henia hahenamo badana ta. (Roma 15:16; 1 Tim. 1:12) Unai bamona oi laloa, a? Namo lasi nega ia lao noho eiava haida edia hevaseha herevadia dainai, ena anina ita laloa maragi matamaia. Haida sibona be Dirava ena ladana huaia gaukarana idia abia. Edena bamona unai hahenamo laloa bada karana ita habadaia diba?
2 Tanobada taudia ese ita idia moale henia lasi Basileia ena sivarai ita harorolaia dainai. Idia momo be iseda gaukara idia laloa maragi. Ma haida be idia hereva dika bona idia dagedage. Unai dagedage karana be gaukara taudia, dekena taudia, eiava ruma bese taudia amo ia mai diba. Reana idia laloa ita kavakava bona ta ese ita ia hakaua kerere. (Ioa. 15:19; 1 Kor. 1:18, 21; 2 Tim. 3:12) Hamanokaia herevadia idia gwauraia iseda ura idia hamaragia bona ita raka metaira matamaia eiava iseda hahenamo badana ita rakatania totona. Satani ese laloa dala dikadia ia havaraia. (2 Kor. 4:4) Dahaka oi karaia?
3 Namona be hanaihanai ita laloa, Basileia ita harorolaia be hari inai nega ena gaukara hereadaena. Iseda hahemauri herevadia be ma dala ta amo idia davaria diba lasi. (Roma 10:13-15) Dirava ena lalo-namo, taunimanima edia lasi, ita abia be gau badana. Ena be tanobada taudia be iseda haroro gaukara idia laloa maragi, to sivarai namona ita gwauraia hedinarai noho mai goada ida.—Kara 4:29.
4 Iesu ese Tamana ena ura karaia karana ia laloa bada momokani. (Ioa. 4:34) Iena goada ibounai ia gaukaralaia unai hesiai gaukarana dekenai. Danu, hedibagani eiava dagedage taudia ia koudia ia gaukara goada noho totona. Hanaihanai iena mauri lalonai, Basileia ia harorolaia be gau ginigunana. (Luka 4:43) Hahegani ita abia iena kara ita tohotohoa totona. (1 Pet. 2:21) Unai bamona ita karaia neganai, ita be ‘Dirava danu ita gaukara.’ (1 Kor. 3:9) Unai hahenamo ita gaukaralaia namonamo, a? Gabu bona nega idauidau ai sivarai namona herevalaia daladia ita tahua, a? Ita be Iehova ena Witness taudia dainai, namona be “inai hanamoa Dirava dekenai do ita henia nega ibounai.”—Heb. 13:15.
5 Iseda laloa dalana ese hesiai gaukarana ai dahaka ita karaia ia haidaua diba. Ita totona Iehova be dahaka ia karaia ita laloa bada momokani, a? Iseda kudou lalonai Iehova lalokau henia karana ita havaraia, bena iseda goada hegeregerena iena hesiai gaukara ita karaia, a? Hari ita moalelaia hahenamodia bona Iehova ena gwauhamata ita lalodia namonamo ese iseda lalokau ita ia Havaraia Tauna dekenai do ia habadaia. Unai lalokau ese ita do ia ha-uraia—hanaihanai Basileia harorolaia gaukarana do ita karaia mai haheauka ida, iseda noho hegeregerena. Iseda lalo-goada karana ese iseda lalokau Iehova bona iseda dekena tauna dekenai do ia hahedinaraia.—Mar. 12:30, 31.
6 Gau ta ita laloa bada be iseda herevalaia bona gaukaralaia daladia amo idia hedinarai. Ita laloa Basileia ita harorolaia be hahenamo badana ita dekenai, a? Iseda hesiai gaukara ita abia isi, a? Ena be dagedage ita davaria to eda lalona ita hadaia vadaeni inai mai anina bada gaukara lalonai ita haheauka totona, a? Bema inai hahenamo badana ita laloa bada, do ita karaia mai eda ura bada bona mai eda kudou ibounai ida.—2 Kor. 4:1, 7.