Dirava Ena Hereva be Mai Ena Siahu
1 Baibel ese taunimanima milion momo edia mauri ia haidaua bada. Ena hereva taunimanima dekenai be mai ena siahu bada, taunimanima edia hereva ena siahu be maragi. (Heb. 4:12) Ita ia durua dalana mani ita laloa. Momokani, iena namo ese buka iboudiai edia namo ia hereaia.
2 Taunimanima iboudiai amo Iehova ena Witness taudia be Baibel idia stadilaia bada bona idia harorolaia bada. Ita badinaia tiokratik sediual lalonai, namona be Baibel duahiduahi karana ita laloa bada, unai ita karaia be mai anina bada, televisen ita raraia eiava moale karana ma ta ese ena gabu ia abia lasi be namo.
3 Ita Karaia Hanaihanai: Iehova ena taunimanima idia diba Baibel duahiduahi karana be mai ena siahu taunimanima dekenai. Lagani momo herea lalonai, Brooklyn dekenai, iseda faktori ta ena haba dekenai toretore badana ta ia noho, ia ese idia raka hanai taudia ia hagoadadia, ia gwau: “Dina Ta Ta Iboudiai Baibel Helagana, Dirava Ena Hereva Umui Duahia.” Betele ruma bese lalonai gaukara totona idia vareai matamaia taudia be edia Betele gaukara idia hamatamaia ena lagani ginigunana lalonai, Baibel ena hereva ibounai idia duahia haorea.
4 Ena be oi bisi bada herea, to Haroro School ena sediual dekenai idia torea hegeregerena, pura ta ta iboudiai Baibel duahiduahi oi karaia, a? Bema unai oi karaia be ia auka, namona be November lalonai emu sediual oi haidaua Baibel duahiduahi do oi karaia totona, ani? Hari hua ibounai lalonai Baibel duahiduahi be Salamo 95 ia lao 109, unai ena anina be pura ta ta iboudiai rau hani eiava ima do oi duahidia. Haida be dina ta ta iboudiai Baibel idia duahia sisina, reana daba kahanai eiava hanuaboi ai, idia do mahuta lasi neganai idia karaia. Herevana edena negai oi karaia, gau badana be Dirava ena Hereva oi duahia hanaihanai karana amo namo do oi davaria.
5 November Lalonai Baibel do Ita Hariharilaia: Taunimanima momo herea be Baibel idia matauraia bona ia dekena amo ita duahia neganai idia ura kamonai. November lalonai ita be New World Translation of the Holy Scriptures Baibel bona Buka Helaga—Dirava ena Hereva Eiava Taunimanima Edia? bukana do ita hariharilaidia. Unai be nega namona kudou-maoro taudia dekenai Dirava ena Hereva ena namo ita hahedinaraia totona. Mai moale danu unai gaukara do ita karaia be namo.
6 Lalohadai namodia haida oi hegaegaelaidia New World Translation Baibel ena namo haida oi hahedinaraia totona, bena unai amo taunimanima edia lalona oi veria diba ta idia abia totona. Edena bamona ia durudia diba oi hahedinaraia. Reana “Bible Topics for Discussion” ena kahana dekena amo hereva ta do oi abia hidi umui kikilaia totona, bena murinai Buka Helaga—Dirava ena Hereva Eiava Taunimanima Edia? bukana oi kikilaia. Eiava Baibel ena indeks, ena rau ibounai be 92, dekena amo edena bamona Baibel siri ta ia davaria diba oi hahedinaraia. Reana pablisa haida be idia ura “Appendix” eiava “Table of the Books of the Bible” idia gaukaralaia, badina idia ura ena namo Baibel stadilaia karana dekenai idia hahedinaraia.
7 Namona be oi hahedinaraia goevagoeva New World Translation Baibel be hari inai nega ita herevalaia English gado dekenai idia karaia, unai dainai ena anina ia hedinarai namo herea. Unai New World Translation Baibel ese Dirava ena ladana, Iehova, be nega 7,210 ia gwauraia.
8 Oibe, Baibel be Dirava ena Hereva. Bema ita duahia, ena hereva ita abia dae, bona iseda mauri lalonai ita badinaia, namo bada herea do ita davaria. Idia torea ita dekenai hadibaia hereva bona helaro ita abia totona. (Roma 15:4) Dina ta ta iboudiai ita duahia bona ita hegaegae ia dekena amo taunimanima ma haida do ita hadibadia totona be gau badana.