Henanadai
◼ Raskol momo idia noho teritori dekenai ita lao haroro neganai, edena dala ai ita naria namonamo?
1 Nega momo, ita kamonai taoni gabudia dekenai, dagedage, taunimanima heatu henia, bona hepapahuahu karadia idia bada idia lao. Ena be unai kara dainai ita gari sisina, to ita diba unai hekwakwanai momo gabudia dekenai kudou-maoro taudia haida idia noho, bona Basileia ena sivarai idia kamonai henia neganai do idia abia dae. Unai dainai nega namona dekenai, iseda gari do ita koua bona ita haroro noho, badina ita diba Iehova ese ita do ia naria.—Her. 29:25; 1 Tes. 2:2.
2 Dika ia vara diba gabuna dekenai ita lao haroro neganai, Iehova ia ura ita naria namonamo bona ita laloa namonamo. Namona be ita gima noho. “Lalo-parara tauna ese dika ia itaia bena ia komu; to ena lalona ia haraga lasi tauna ia raka ia lao bena ia hekwakwanai.” (Her. 22:3) Idia manada vadaeni pablisa taudia idia diba gabu haida dekenai tadikaka rua rua eiava ma haida idia haroro hebou be aonega dalana. Kohelete 4:9, 12 ia gwau: “Rua edia namo ese tamona ena namo ia hanaia . . . Tau ta ese tau tamona do ia hadarerea diba reana, to tatau rua ese do idia koua diba.” Raskol taudia be sibona ia loaloa tauna idia tahua badina idia hagaria be auka lasi.
3 Ruma badana mai ena noho rumadia momo gabuna dekenai oi vareai neganai, taunimanima idia noho lasi raka gabudia bona vadavada gabudia dekenai oi naria namonamo. Ta ese ena flat eiava ruma lalonai oi ia boiria neganai, oi naria namonamo oi vareai kava lasi. Oi ia hagaria toho eiava oi ia habadua toho tauna ida oi hepapahuahu lasi. Karaharaga oi hahedinaraia oi be Iehova ena Witness tauna ta. Pablisa haida be hanaihanai edia imana dekenai Baibel eiava Gima Kohorona eiava Noga! magasin idia dogoatao, unai amo taunimanima idia diba idia be daidia.
4 Bema unai gabu dekenai taunimanima haida idia gini kava idia oi itadia namonamo. Bema taunimanima idia noholaia ruma badana ena lift dekenai idia vareai taudia be unai ruma taudia lasi, oi vareai lasi. Davana bada herahera gaudia oi karaia lasi. Bema hanuaboi dekenai oi loaloa, namo lasi ia dibura bona motuka momo lasi idia heau dalana dekenai oi raka. Bema oi idia dogoatao oiemu moni eiava kohu sibona idia abia totona, oi heai toho lasi; oiemu mauri be gau badana, tauanina ena kohu ta be anina lasi.—Mareko 8:36.
5 Haroro gaukara idia gunalaia taudia idia gima namonamo be gau badana, namona be teritori dekenai nega ibounai idia diba pablisa taudia be edeseniai idia gaukara. Grup taudia be gabu tamona dekenai idia gaukara be namo, unai neganai ma haida be idia kahirakahira dekenai idia gaukara. Bema unai gabu dekenai dagedage eiava hepapahuahu karana ta ia vara, grup taudia be karaharaga unai gabu idia rakatania be namo.
6 Bema ita gima noho bona ita laloa namonamo, raskol momo gabudia dekenai ita haroro noho diba bona “kara dika rohorohodia iboudiai, hanua lalonai idia karaia be idia taitailaia bona idia ganaganalaia taudia” do ita davaridia.—Esek. 9:4.
This article is repeated in km 12/02.