Nega Ibounai Gaukara Momo Karaia
1 Iehova ena taunimanima idia bisi bada herea badina edia famili lalonai, gaukara gabuna ai, bona sikuli ai idia be mai edia gaukara. To, gau ginigunana be “nega ibounai Lohiabada ena gaukara momo [idia] karaia.” (1 Kor. 15:58, NW) Wiki ta lalonai kongregesen hebou totona ita hegaegae bona ita lao. Ita idia hagoadaia wiki ibounai ita haroro. Nega ita atoa siboda eda stadi bona famili stadi totona. Elda bona hesiai taudia kongregesen lalonai be mai edia maduna momo. Nega haida tadikaka namodia idia manoka bona ita durudia be namo.
2 Nega haida iseda mamina be unai maduna be metau herea, edena bamona lau huaia diba? To, gaukara momo idia karaia taudia idia moale bada herea diba bema unai gaudia idia haria namonamo bona laloa maoromaoro neganai.—Koh. 3:12, 13.
3 Aposetolo Paulo be gaukara momo tauna. Aposetolo ma haida totona ia gaukara bada bona unai gaudia murinai, palai rumadia ia karaia ena mauri gaudia ia abia totona. Ia hesiku lasi, to ruma ta ruma ta bona taunimanima idia noho gabudia dekenai ia haroro, bona nega tamona ai mamoe naria maduna kongregesen lalonai ia huaia namonamo. (Kara 20:20, 21, 31, 34, 35) Gau momo idia noho Paulo ena sediual lalonai, to hanaihanai ia ura Iehova ena hesiai gaukara ia habadaia.—Roma 1:13-15 itaia.
4 Paulo ese ena maduna momo ia huaia namonamo bona ena kudou ia moale noho badina be Iehova ia tabekau henia dainai, Ia amo goada ia abia. Iena haroro gaukara amo ahuna namona bona mamina namona ia abia. (Fil. 4:13) Ia diba Dirava ese ena kara namodia do ia laloaboio lasi. (Heb. 6:10) Dirava ena kara ia hadibaia ma haida dekenai dainai ia moale bona unai ese Paulo ia hasiahua bamona. (1 Tes. 2:19, 20) Baibel dekenai ia noho helarona ese Paulo ia doria ena gaukara ia karaia noho mai goada ida.—Heb. 6:11.
5 Iseda gaukara ena namo ia havaraia gaudia ita laloatao be namo. Kongregesen hebou dekenai ita lao bona iseda haere karana ese ma haida ia hagoadaia diba. (Heb. 10:24, 25) Mai lalona ibounai ida ita ura taunimanima iboudiai ese sivaraia namona idia kamonai; unai amo matamata taudia momo be ita ida do idia hebou bona iseda kongregesen do ia tubu. (Ioa. 15:8) Heduru heheni karana ese ruma bese tamona hemamina do ia havaraia kongregesen lalonai. (Iak. 1:27) Paulo bamona, ita laloaboio lasi iseda mai anina gaukarana ese Iehova ia hamoalea momokani. Ita diba ia ita hesiai henia be hahenamo badana, bona ita dekenai unai be mauri dalana hereadaena!
6 Bema nega ibounai gaukara momo ita karaia, hahenamo ma ta do ita abia. Lauma dalanai gaukara momo ita karaia neganai, nega ia heau haraga bamona. Hari gaukara momo maurina ita moalelaia badina ita diba dina ta ta idia ore ena anina be ita lao kahirakahira tanobada matamata dekenai. Gaukara momo ita karaia be aonega karana, badina nega be lasi tanobada ena anina lasi gaudia totona.—Ef. 5:15, 16.
7 Momokani, Lohiabada ena gaukara be bada. To ita moale noho diba bema Iehova Dirava bona Iesu Keriso ita tabekau henia. Idia ese iseda hesiai gaukara maduna idia hametaua lasi, to ita idia hagoadaia.—Mat. 11:28-30; 1 Ioa. 5:3.