Ma Haida Edia Namo Ita Tahua
1 Ia hedinarai goevagoeva Iehova ese taunimanima edia namo ia tahua. Ia havaraia gaudia iboudiai edia mauri durua gaudia momo ia henidia, ani? (Gen. 1:29, 30; 2:16, 17; Mat. 5:45; danu Luka 6:35 oi itaia.) Bona gau badana be inai: ia hedinarai goevagoeva ia be taunimanima edia namo ia tahua, badina kara dika bona mase dekena amo idia ia ruhaia, ani?—Ioane 3:16.
2 Iesu be tanobada dekenai ia noho neganai, ena Tamana hegeregerena, ia ese dala goevadaena dekenai ia hahedinaraia ia be taunimanima edia namo ia tahua. (Mat. 11:28-30; 1 Pet. 2:21) Lepera gorere ia abia tauna be Iesu dekenai ia gwau: “Lohiabada e, bema oi ura, oi hagoevaia diba lau.” Iesu ia haere henia, ia gwau: “Lau ura,” bona unai tauna ia hanamoa. (Mat. 8:2, 3) Iesu ese Nain hanua ia raka henia neganai, taunimanima be mase merona idia huaia mai, unai mero be vabu ena natuna tamona, bona idia ia itaia neganai ia hebogahisi bada dainai, unai mero ia hamauria lou. (Luka 7:11-15) Ena be idia noia lasi, to Iesu be taunimanima edia namo ia tahua. Natudia danu edia namo ia tahua dainai nega ia atoa ia hereva henidia totona, bona ena be ia bisi, to nega ia atoa lalohisihisi taudia ia durudia totona bona ma haida ia hagoadaia totona.—Mat. 20:31-34; Mar. 10:13-16.
RUMA BESE BONA TURADIA
3 Iehova bona Iesu Keriso bamona, namona be dala ita tahua taunimanima edia namo ita tahua totona. Hari, namona be unai dala haida do ita kikilaia.
4 Gau badana be tadikaka ese edia ruma bese taudia edia namo idia tahua, bona lauma dalanai idia durudia noho. Unai anina be nega hanaihanai ruma bese stadi do idia karaia. Ruma bese stadi lalonai, umui stadilaia sivaraina oi kikilaia namonamo ruma taudia idia moalelaia totona, bona idia gaukaralaia diba totona, a? Hanaihanai emu ruma bese taudia ta ta ibounai danu umui haroro hebou, a? Unai bamona umui karaia neganai, umui moale, a? Emu natudia oi hadibaia taunimanima ma haida durudia urana idia abia totona, bona Keristen lalokau edia dekena taudia dekenai idia hahedinaraia totona, a? Bema oi headava to hari emui natudia idia bada bona ruma dekenai idia noho lasi, oi ese emu adavana danu ruma bese stadi umui do karaia noho, a?
5 Dala ia kehoa neganai, taunimanima ibounai be lauma dalanai ita durudia be namo. Nega haida ita bisi dainai, reana kongregesen dekenai haida idia dabu neganai, ita durudia lasi, ani? (Her. 3:27; Gal. 6:10) Keristen kongregesen lalonai, tamana lasi memero, buruka taudia, vabu, gorere taudia, lalo-metau taudia, tauanina ia hegeregere lasi taudia, eiava idia dabu taudia ese heduru idia ura abia. Iehova bona iena Natuna, Iesu Keriso, edia kara hegeregerena, namona be ita ese iseda tadikaka bona taihu iboudiai edia namo ita tahua.—1 Kor. 10:24; Fil. 2:4; Heb. 13:16.
MAMOE BAMONA TAUDIA ISEDA HARORO TERITORI DEKENAI
6 Bible stadi taudia edia namo be edena bamona ita tahua diba? Idia momo idia lalo-parara vadaeni edia turana karana tanobada taudia dekenai idia koua be namo. Ena be ita bisi, to namona be nega ita atoa unai bamona taudia edia namo ita tahua totona. Edia mauri idia haidaua taudia be iseda turadia namodia ai ita halaodia, a? Ena be reana idia be iseda stadi taudia lasi, to idia ita hagoadaia noho, a?—Mareko 10:28-30 itaia.
7 Sivarai namona harorolaia gaukarana ita habadaia diba kamonai taudia momo edia namo ita tahua totona, a? Ita ura ita durudia lauma dalanai idia goada totona, a? Oi be dahaka do oi karaia diba oi sibona emu haroro gaukara do oi habadaia totona? Bema dala ia kehoa emu haroro gaukara do oi habadaia totona, oi naria lasi, oi karaia.—Luka 9:60-62.
8 Iehova bona Iesu edia kara hegeregerena, taunimanima edia namo ita tahua be gau badana. Namona be ita hebogahisi bona durudia dalana ita tahua, Iesu ese lepera tauna ia durua bamona. Oibe, namona be ita gima noho taunimanima edia namo ita tahua totona.
[Questions]
1. Iehova ese taunimanima edia namo ia tahua hamomokania dalana haida oi gwauraia hedinarai.
2. Iesu ese taunimanima edia namo ia tahua ena haheitalai haida Bible dekenai oi gwauraia hedinarai.
3, 4. (a) Lauma dalanai tadikaka ese edia ruma bese taudia idia durudia dalana haida oi gwauraia hedinarai. (b) Ruma bese ena stadi lalonai tamana, sinana, bona natudia edia kara be edena bamona?
5. (a) Iseda kongregesen lalonai, reana daika daika ese heduru idia ura abia? (b) Bible dekena amo oi hamomokania iseda maduna be dabu taudia ita durudia.
6, 7. Iseda kara kamonai taudia matamatadia dekenai ita diba totona, Mareko 10:28-30 bona Luka 9:60-62 dekenai, dahaka sisiba ia noho?
8. Iehova bona Iesu hegeregerena, edena dala ta amo taunimanima edia namo oi tahua diba?