Ma Haida Umui Laloa—Kahana 1
1 Iehova ena bese taudia edia noho namona ita itaia bona kongregesen edia namba ia bada ia lao dainai ita moale. Gabu haida dekenai, hegeregere siti badadia ai, edia Kingdom Hall idia gaukaralaidia momo bona nega haida kongregesen idauidau momo be Kingdom Hall tamona idia gaukaralaia. Unai ia vara neganai, iboudiai be ma haida idia laloa bada be gau badana.
2 Namona be Kingdom Hall idia gaukaralaia kongregesen ta ta ese idia rakatania neganai idia hagoevaia bona idia atoa namonamo, gabeai do idia mai tadikaka dainai. Namona be helai gaudia, buka, bona magasin idia atodia lou edia gabu korikori dekenai, bona tadikaka idia rakatania kava gaudia danu idia haboua. Mei rumadia idia hagoevaia, momoru idia negea bona sopu, imana dahua oho gaudia, bona toilet pepa ma haida idia atoa be namo.
3 Sediual hegeregerena, hebou ma ta ia matamaia gwauraia neganai, namo lasi edia hebou ia ore vadaeni taudia idia do noho dainai murina hebou hegaegaelaia karana idia hadikaia. Reana, kiki hebou negana idia halataia dainai, vareai gabuna do idia hahonua momokani bona tadikaka do idia hegaegae namonamo diba lasi murina hebou totona. Kingdom Hall ai reana motuka atoa gabudia be momo lasi; oi rakatania haraga bena ma haida idia vareai diba be hebogahisi karana. To, unai hebou ma ta idia lao henia taudia idia ginidae haraga be namo lasi danu, badina vareai bona motuka atoa gabudia do idia honu momokani.
4 Kongregesen haida ese Kingdom Hall tamona idia gaukaralaia gabudiai, wiki ta ta lalonai Kingom Hall idia hagoevaia totona, sediual idia karaia hebou be gau badana. Vaia, kongregesen ta ta be mai ena Kingdom Hall hagoevaia negana. Emui kongregesen be unai maduna ia abia neganai, nega korikorina ai umui hagoevaia namonamo, bena kongregesen ma haida idia maumau diba lasi.
5 Nega haida kongregesen ta ta ese edia hebou negadia do idia haidaua, hegeregere, sekit naria tauna ia vadivadi neganai. Kongregesen ena hebou negana idia haidaua gwauraia neganai, namona be wiki haida gunanai elda taudia ese unai Kingdom Hall idia gaukaralaia kongregesen ma haida idia hamaoroa, edia pablisa taudia do idia hadibaia totona. Danu, bema Painia Gaukara Sikuli, sekit ena elda taudia edia hebou ta, eiava headava herevana idia karaia gwauraia, namona be kongregesen ma haida bona sekit naria taudia idia nanadaia guna; edia sediual idia karaia neganai unai do idia laloa.
6 Nega haida, Kingdom Hall tamona dekenai idia hebou taudia be sekit idauidau lalodiai. Unai gabudia ai, sekit naria taudia ese edia vadivadi negadia ena sediual idia herevalaia hebou be gau badana. Bema loaloa naria taudia rua be pura tamona ai gabu tamona idia vadivadi, reana hebou ena nega idia haidaua haraga toho eiava hekwakwanai ma haida do idia vara.
7 Bema mai edia lalokau ida ma haida idia laloa, idia herevahereva hebou bona idia gaukara hebou sediual idia karaia neganai, kongregesen iboudiai do idia hetura namonamo bona do ia vara gauna be “gau ibounai umui karaia namonamo, mai dala maorona, karaia kava lasi.”—1 Kor. 14:40.