Lou Henidia Karana amo, Hebogahisi Oi Hahedinaraia
1 Ruma ta ruma ta ai kamonai taudia oi tahua karana ia hahedinaraia oi ura ma haida be Basileia ena sivarai idia kamonai henia diba. Unai dainai, January lalonai oi gaukara goada buka idia abia vadaeni taudia oi lou henia totona, badina unai be ma haida dekenai hebogahisi hahedinaraia dalana namona.
2 Bema “Mauri ia lao henia Hereva Momokanina” bukana oi hariharilaia, inai bamona umui kiki hebou matamaia lou diba:
◼ “Vanegai Dirava ena Basileia bona ita totona dahaka do ia karaia ita herevalaia. Unai Basileia ese tanobada be paradaiso ai do ia halaoa. Paradaiso ta ita do itaia lasi dainai, reana ena toana ita laloa be do ia auka. Reana ena toana be do inai bamona. [Laulau rau 4 dekenai oi hahedinaraia.] Baibel ese unai bamona paradaiso ia gwauhamatalaia.” Salamo 72:7 duahia. Rau 10, paragraf 11 bona 12 oi davaridia, bona dahaka ita karaia bema ita ura Paradaiso lalonai do ita noho oi hahedinaraia.
3 “Memero Kekeni—Moale Umui Davaria Dalana” bukana ia abia dae tauna oi vadivadi lou neganai, reana inai bamona do oi hereva:
◼ “Ita ibounai ita ura ita moale. Matamata taudia momo idia laloa inai tanobada dekenai moale korikorina abia dalana be lasi. Oiemu hemami be edena bamona? [Haere oi naria.] Haida idia gwau moale be laloa dalana. Bema lalokau ma haida dekenai, hemataurai Dirava dekenai, bona helaro namona ita lalodia hanaihanai, ena be mai eda hekwakwanai to moale korikorina ita abia diba.” Salamo 119:1, 2 duahia. Taunimanima lalokau henia, Dirava matauraia, bona mauri ena badina davaria daladia harihari bona gabeai danu, Baibel stadi ese ita do ia hadibalaidia.
4 “Maino Bona Noho Namona—Edena Bamona Oi Davaria Diba?” bukana ia abia tauna oi lou henia neganai, reana inai hereva kwadogina oi henia diba:
◼ “Inai tanobada idia hakaua taudia ese maino bona noho namona idia do havaraia diba lasi. Iehova Dirava sibona ese unai ia karaia diba. Baibel ese dahaka do ita karaia be namo ia hahedinaraia. [Rau 178, paragraf 1 bona 2 edia hereva oi kikilaia, bena Isaia 26:4 duahia.] Inai buka be edena bamona oi ia durua diba lau ura oi dekenai lau hahedinaria.”
5 “Dirava ese Ita Ia Laloa Eiava?” buklet oi hariharilaia murinai, oi lou henia neganai reana inai bamona oi hereva:
◼ “Vanegai inai buklet ta be oi dekenai lau rakatania. Ia be henanadai badana ta ia gwauraia: ‘Dirava ese ita ia laloa eiava?’ Buklet oi duahia murinai, dahaka oi laloa? [Naria ia haere totona.] Maino dekenai do ita noholaia tanobada paradaisona idia gwauhamata Baibel siridia oi duahia neganai, reana oi idia hagoadaia. [Rau 2 bona 3 edia laulau bona tanobada matamatana ena namo haida oi herevalaidia.] Momokani, oi bona emu lalokau taudia, lau laloa emui ura be unai bamona tanobada dekenai do umui noho. Rau 31, paragraf 16 ena hereva mani oi laloa.” Paragraf oi duahia, bona oi hahedinaraia Iehova ita tahua karana ena anina be ia bona ena ura ita dekenai ita diba, anina be ena Hereva, Baibel, ita stadilaia.
6 Mai lalokau ida ena mamoe ia naridia tauna bamona, Iehova be haheitalai goevadaena. (Esek. 34:11-14) Iena mai lalokau ida naria karana ita tohotohoa ese iseda lalokau ia hahedinaraia, Iehova ia hamoalea, bona ma haida dekenai hahenamo ia mailaia.