Pablik Tok Edia Namo Abia
1 Nega korikori ai, Keristani kongregesen taudia ese Baibel ena hahediba herevadia edia anina idia dibaia goevagoeva bona lalo-parara matamata idia abia noho. (Mat. 24:45-47) Reana Iehova ena Witness taudia oi bamoa negana lalonai haheitalai haida oi laloatao. Kongregesen heboudia, pablik tok danu, ese hereva momokani diarina ia bada ia lao idia hahedinaraia.
2 Idia Hanamodia Autlain: Vanegai, Society ese English gado pablik tok autlain haida ia hanamoa, bona hari ai hahanaia noho Hiri Motu bona New Guinea Pidgin gado dekenai. Hereva matamata idia atoa, bona mai anina bada herevadia idia hedinarai goevagoeva. Kongregesen ese unai gau matamata edia namo do idia abia totona, pablik tok ia henia tadikaka ese autlain matamata do ia gaukaralaidia sibona. Autlain matamata umui abia neganai, gunadia oi kokia bona gaukaralaia lasi.
3 Pablik tok edia namo abia totona, namona be edia hereva kwarana oi laloa guna. Pablik Tok Hebouna dekenai oi do lao lasi neganai, tok ena sinado ia kikilaia gaudia, reana buka o magasin matamata, edia hereva oi laloatao toho. Bena, oi kamonai neganai, tadikaka ese unai hereva ia habadaia dalana oi laloa. Bema oi diba vadaeni gauna be dala idauna ta ai ia hahedinaraia, oi laloatao, gabeai oi gaukaralaia diba totona. Unai dala amo idia hanamoa pablik tok edia namo do oi abia momokani.
4 Pablik Tok be Kamonai Taudia Hadibaia Bona Edia Lalona Hamarerea Totona: Iesu ia hereva neganai, kamonai taudia edia kudou ia hamarerea. Pablik tok hereadaena, Ororo ai Iesu Ena Hereva Badana, ia ore gwauraia neganai, Mataio 7:28 ai ia gwau: “taunimanima ese iena hadibaia hereva dekenai idia hoa bada.”
5 Elda oreana ese Iesu ena haheitalai idia laloatao be namo, pablik tok do idia karaia diba tadikaka matamatadia idia abia hidi kava lasi; tisa taudia namodia, Society ena autlain idia badinaia, bona edia hereva dalana ese taunimanima ia hahesikua lasi tadikaka sibodia idia abia hidi. Pablik tok henia maduna bona hahenamo idia abia tadikaka ese edia hereva henia dalana idia hanamoa noho, bona elda idia henia sisiba idia abia dae. Daudau gabudia dekenai reana pablik tok idia henia diba taudia be lasi. Unai ia vara neganai, sekit naria tauna ese idia do ia hadibaia edena dala ai autlain haida edia hereva idia kamonai diba. Reana ia bapatiso vadaeni tadikaka (o reana nega haida ia bapatiso vadaeni taihu ta) ese idia kamonai taudia dekenai autlain ia duahia. Unai dala amo iboudiai, kamonai matamata taudia danu, ese Iehova ena orea ia hegaegaelaia herevadia idia kamonai bona ena namo idia abia.
6 Isaia 65:13, 14 ai ia perovetalaia hegeregerena, Dirava ena taunimanima be lauma dalana ai idia taga idia lao. Pablik tok kamonai henia karana be Iehova ena “hadibaia” daladia ta.—Isa. 54:13.