Henanadai Mauana

◼ Iehova ena Witnes taudia ese tok pepadia o idia rekodia tok be ma haida dekenai idia hariharilaia be maoro, a?

Nega momo pablik tok amo goada ita abia. (Kara 15:32) Unai dainai, haida be hebou idia reaia neganai, ita ura ita kamonai hereva namodia amo idia ita hagoadaia. Hari inai negai, rekodi gaudia idauidau idia noho dainai, tok haida ita rekodi bona ma haida dekenai ita siaia be auka lasi. Haida be tok momo, idaunegai gaudia haida danu, idia rekodia bona idia dogoatao noho, bona idia ura unai tok idia henia o kopi idia karaia bona edia turadia dekenai idia henia. Ma haida be sibodia edia Web sait dekenai unai bamona tok idia atoa, ma haida ese idia abia totona.

Oi sibona totona eiava emu ruma bese taudia totona tok ta oi rekodia be kerere lasi. Danu, kongrigeisen ai haida be gorere dainai hebou dekenai idia mai diba lasi neganai, elda taudia ese tok haida idia rekodia diba bona idia dekenai idia abia lao. To, ma badina haida dainai, namona be ita torea eiava ita rekodia tok be ma haida dekenai ita hariharilaia lasi.

Nega momo tadikaka be kongrigeisen ta durua dalana ia laloa dainai ena tok do ia henia, to ita be unai kongrigeisen taudia edia noho dalana ita diba namonamo lasi dainai, reana unai tadikaka ena tok, idia rekodia gauna, ena point haida ita gwauraia kerere diba. Danu, namona be tok ia henia tauna bona ia henia negana ita diba be gau badana, unai amo iena hereva ita abia dae be auka lasi. (Luka 1:​1-4) Ma danu, ita ura lasi ma haida dekenai tok pepadia o idia rekodia tok hariharilaia karana amo ita sibona o ma haida edia ladana ita abia isi.​​—1 Kor. 3:​5-7.

Hesiai tauna mai ena kamonai bona kara maoromaoro oreana be ia gaukara goada “nega korikori ai” Dirava ena hereva idia halasia totona. (Luka 12:​42, NW ) Unai bamona gaudia haida be, Iehova ena Witnes taudia edia kongrigeisen ai idia henia tok pepadia, bona iseda Web sait ladana jw.org amo ita abia rekodi gaudia. Ita diba momokani, hesiai tauna mai ena kamonai bona kara maoromaoro bona ena Hakaua Oreana be heduru gaudia korikoridia do idia halasia, iseda abidadama ia goada noho totona.​​—Kara 16:​4, 5.