Iehova ese Goada Ia Henia
1 Ita be Iehova ena taunimanima dainai, ita ia henia gaukarana be sivarai namona ita harorolaia bona ita karaia noho lalonai “Dirava idia diba lasi taudia edia vairanai, kara namodia” ita karaia. (1 Pet. 2:12; Mat. 24:14) Nega dokona ai ita noho bona iseda manoka bona kara dika dainai, ita diba ita sibona ese inai gaukara ita hagugurua diba lasi. (2 Tim. 3:1-5) Ita moale momokani Iehova ena heduru ita noia diba!
2 Aposetolo Paulo ese hetoho momo ia haheaukalaia. (2 Kor. 11:23-27) Edena bamona unai ia haheaukalaia bona iena gaukara ia haorea? Paulo be ‘Dirava dekena amo siahu bada’ ia abia dainai. (2 Kor. 4:7) Paulo ese unai Dirava ia henia goadana ia laloa, bona ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” (Fil. 4:13, NW) Paulo bamona, Iehova ese ita dekenai goada ia henia diba. Edena dala ai unai heduru ita abia?
3 Nega Ibounai Guriguri: Iesu ese ita ia hagoadaia iseda ‘noinoi, tahua, bona pidipidi’ karana ita hadokoa lasi. (Luka 11:5-10) Bema nega ibounai gau ta ita gurigurilaia, Iehova do ia itaia unai gauna ita laloa bada, iseda ura ia goada, bona iena heduru ita ura dikadika ita abia. (Sal. 55:17; 88:1, 13; Roma 1:9-11) Paulo ia diba nega ibounai ita guriguri be mai anina bada badina ita ia hamaoroa “nega ibounai do umui guriguri.” (1 Tes. 5:17) Guriguri be Iehova ena heduru abia dalana badana ta.
4 Tiokratik Hakaua Dalana Badinaia: “Tiokratik” ena anina be “Dirava ese ia lohiaia.” Dirava be lalokau. Iena lohia dalana amo namo do ita abia bema iena lohia siahuna ita abia dae bona ena hereva be abia hidi badadia bona maragidia lalonai do ita badinaia. “Hesiai tauna mai ena kamonai, bona mai ena kara maoromaoro” ese tanobada dekenai unai tiokratik lohia dalana ia laulaulaia. (Mat. 24:45-47) Bema ita ura Iehova ena hahenamo ita abia, gau badana be unai “hesiai tauna” ese ia gaukaralaia oreana ita kamonai henia. (Heberu 13:17 itaia.) Iehova ese ia ita badinaia karana bona iena taravatu ita ura dikadika karaia badinaia dainai, iena siahu amo nega korikori ai ita do ia hagoadaia.—Heb. 4:16.
5 Iseda Tadikaka Kahirakahira Ita Noho: Iesu ena hahediba taudia do oi diba edia lalokau heheni karana amo. (Ioa 13:34, 35) Tadikaka edia kara be idauidau dainai, nega haida unai idau ese hekwakwanai ia havaraia. Namona be hebogahisi heheni karana bona kerere gwauatao heheni karana ita manadalaia. (Ef. 4:32) Unai amo hereva momokani lalonai iseda tadikaka kahirakahira ai do ita noho diba bona hetoho idia haheaukalaia neganai edia kara ese ita do ia hagoadaia. Ita diba iseda “Keristani varavara taudia tanobada kahana ibounai dekenai, be hisihisi inai bamona idia abia noho” dainai, ita danu ese hetoho ita davaria neganai ita diba Dirava ese goada do ia henia.—1 Pet. 5:9.
6 Sibona Eda Stadi Karaia Hanaihanai: Lauma dalanai iseda lalona bona kudouna ita hagoadaia karana amo Satani do ita koua. (1 Pet. 5:8) Sibona eda stadi ita karaia neganai, Baibel ena diba ita habadaia iseda lalona dekenai. Iseda mauri lalonai hekwakwanai ita davaria neganai, unai diba ita gaukaralaia. Paulo ese ia hahedinaraia “hereva momokani” ita dibaia namonamo be gau badana bema ita ura ita roho mauri. (1 Tim. 2:3, 4) Hanaihanai lauma aniani ita ania be mai anina bada gauna.
7 Ita do ia hagoadaia noho lauma aniani ibounai be Keristani kongregesen lalonai do ita davaria. Bema mai eda lalona ibounai ida Keristani kongregesen ita durua, Iehova ia gwauhamata hegeregerena, do ita “raka lao, bona do [ita] moru lasi.”—Isa. 40:29-31.