Keriso, Matamata Taudia Edia Haheitalai
1 Baibel idia herevalaia daudau murinai, tauhau ta ia gwau: “Iesu Keriso ena kara ese lau ia hahoaia. Unai bamona gunalaia tauna lau abidadama henia diba.” Spot dekenai idia kwalimu taudia, politik lalonai idia noho taudia, eiava TV dekenai ladana bada taudia be unai bamona oi gwauraia diba lasi. Keristani momokani taudia dekenai, tanobada taudia, edia Keriso bamona lasi maurina idia badinaia mai hemarai lasi ida taudia, be haheitalai namodia lasi.—Sal. 146:3, 4.
2 Matamata taudia ese Iesu Keriso idia abidadama henia neganai, idia be Dirava ena mamoe bona Iesu ese idia ia dibaia. Mamoe Naria Tauna Namona ese idia ia laloa bada. (Ioa. 10:14, 15, 27) Haheitalai Tauna, Keriso, idia tohotohoa matamata taudia be hahenamo idia abia.
3 Brooklyn Betele dekenai ia gaukara tadikakana ta ena lagani be 8 negana amo, iena tahua gauna be Betele hesiai gaukara ia karaia. Iena tama sina, bona sekit naria taudia ese idia hagoadaia Iesu ena haheitalai ia tohotohoa totona. Idia gwau ia bada neganai, ia karaia dalana namona ta be Betele gaukara. Betele gaukara hegaegaelaia totona ia idia durua Betele taudia idia karaia gaudia bamona ia karaia namonamo: iena ruma gaukara, Kingdom Hall hagoevaia bona hanamoa gaukara, bona iena haroro dalana ia hanamoa. Hari, lagani haida lalodiai Betele dekenai ia gaukara, bona ia moale ia mero neganai Iesu ena haheitalai ia tohotohoa.
4 Iesu ese dagi bada moni gaukarana ia tahua lasi; hesiai gaukara ia abia hidi. Matamata taihu ta be sikuli ia haorea murinai ia ura painia gaukara ia karaia, to pat-taim gaukara ia davaria haraga lasi dainai ia matamaia lasi. Ia laloa: ‘Pat-taim gaukara do lau davaria guna, bena painia aplikeisini pepana do lau henia.’ Elda ta ese ia hamaoroa, bema ia naria daudau, ful-taim gaukarana ta ese ia do ia hedibagania badina painia maduna ia huaia lasi dainai, gau ta ese ia do ia koua lasi. Ia gwau: “Iehova lau guriguri henia iena lauma ese lau ia hakaua totona.” Maoromaoro heduru painia aplikeisini ia henia bona gabeai regula painia ai ia lao. Nega sisina murinai, pat-taim gaukara namona ia davaria bona iena painia gaukara sediual ia badinaia noho diba.
5 Iesu ese taunimanima ibounai dekenai Basileia ena sivarai ia harorolaia. (Mat. 4:23) Matamata Keristani taudia danu be mai goada ida idia haroro diba, ma haida dainai do idia gari lasi. Lagani 14 Witness merona ta ia gwau: “Sikuli taudia iboudiai idia diba lau be Keristani merona ta. . . . Idia diba vadaeni dainai, lau haroro neganai bema ta lau davaria, lau hemarai lasi. Stiuden taudia be nega momo idia kamonai, bona buka o magasin idia abia.”
6 Iesu ena haheitalai laloa karana ese matamata taudia ia durua abia hidi namodia do idia karaia. Tanobada taudia idia tahua goadagoada gaudia do idia laloa bada lasi, to idia ‘ia karaia Diravana’ ena hesiai gaukara mai goada ida do idia karaia. (Had. 12:1) Iesu Keriso bamona, ‘Tamana ura henia karana’ idia ura habadaia badina unai amo idia abia hahenamodia ese inai tanobada ia henia gaudia edia namo ia hanaia momokani. Tanobada taudia ida do “idia ore” lasi, to idia moale do idia “noho ela bona hanaihanai.”—1 Ioa. 2:15-17.