Oiemu Natudia Totona Dahaka Tahua Gaudia Oi Atoa?
1 Mauri lalonai ita kwalimu totona, namona be mai anina bada gaudia ita laloa bona ita tahua. Anina lasi gaudia bona idia karaia diba lasi gaudia idia tahua taudia momo be dokona ai idia lalohisihisi bona idia kwalimu lasi. Aonega ese ta do ia durua edena gaudia ia tahua ena “mauri gabeai do ia durua totona.” (1 Tim. 6:19) Ita moale bada badina Iehova be iena Hereva bona iena orea amo, do ita badinaia dala maorona ia hahedinaraia!—Isa. 30:21.
2 Unai lalokau sisibana ia henia neganai, Iehova ese haheitalaia namona ia hahedinaraia tama sina totona. Tama sina mai aonegadia ese edia natudia idia rakatanidia lasi sibodia edia dala idia abia hidi totona, to idia hadibadia edena dala dekenai do idia raka, bena idia buruka neganai, “unai dala do [idia] rakatania lasi.” (Aon. 22:6) Keristani tama sina idia diba sibodia edia aonega do idia abidadama henia lasi; Iehova dekenai idia tabekau be namo. (Aon. 3:5, 6) Idia do aonega lasi natudia danu ese unai bamona idia karaia be namo.
3 Tama sina ese edia natudia totona mai anina bada gaudia idia abia hidi diba bona idia durudia unai “gau namodia” idia laloa bada totona. (Fil. 1:10) Famili stadi karana amo idia hamatamaia diba, natudia do idia hadibaia stadi be mai anina bada bona stadi amo diba do idia abia. Natudia ese kongregesen hebou totona idia hegaegae guna bona sibodia edia hereva amo idia haere karana idia manadalaia be namo. Nega ibounai idia haroro be gau badana. Natudia matamata ese pepapepa idia hariharilaia, siri idia duahia, eiava magasin idia hariharilaia diba. Idia duahiduahi diba neganai, Haroro Sikuli lalonai idia vareai be namo, unai ese lauma dalanai edia tubu do ia durua bada. Bapatiso lasi pablisa eiava bapatiso totona idia hegeregere neganai, unai be mai anina bada karana ta idia hagugurua.
4 Natudia be lagani 13 ia lao 19 lalonai, eiava unai lagani idia do abia lasi neganai, tama sina ese idia dekenai dahaka do idia karaia idia herevalaia namonamo be gau badana. Ia auka lasi, sikuli ena sisiba henia taudia bona edia sikuli turadia ese edia lalona idia ania, tanobada gaudia tahua totona. Tama sina ese edia natudia idia durua be namo gaukara ta ia hadibaia sikuli kosi namona idia abia totona. Unai amo idia ese tauanina durua gaudia idia abia diba, bona Basileia ena gaukara do idia tahua guna. (1 Tim. 6:6-10) Idia hagoadadia idia headava haraga lasi totona, bena gabeai, bema idia ura idia headava, do idia hegeregere headava ena maduna idauidau idia huaia totona. (Mat. 19:10, 11; 1 Kor. 7:36-38) Bema, tama sina ese painia gaukara, haroro taudia be momo lasi gabudia dekenai hesiai gaukara karaia, Betele, eiava misinari gaukara be mai moale ida idia herevalaia neganai, natu maragidia edia lalona dekenai do idia ura Iehova hamoalea gaukarana do idia karaia, haida idia durua, bona idia sibodia dekenai hahenamo idia mailaia.
5 Iehova ena orea lalonai, Keristani kara idia badinaia bona tiokratik gaudia idia tahua matamata taudia momo be sibodia ese unai idia karaia lasi. Idia kwalimu diba badina edia lalokau tama sina ese idia durudia. Bema oi be tama eiava sina, oiemu natudia be edena dala dekenai idia raka lao noho? Idia be Basileia ena gaukara gaudia idia tahua goada noho, a? Inai oi laloatao: oi karaia diba mai anina bada gauna be emu natudia dekenai hereva momokani oi hadibaia bona dina ibounai oi herevalaia. Oi abia diba hahenamona be oiemu famili be mai abidadama ida Iehova do idia hesiai henia.—Deut. 6:6, 7; Ios. 24:15.