Nega Ibounai Guba Gaudia Do Umui Laloa
1 The New York Times, December 31, 1994 gauna, ena hereva ta ese hari ia noho uru taudia bona edia lalohadai nega vaira totona ia kikilaia neganai, ia gwau: “Taunimanima ese vaira negana idia gari henia. Idia gari edia moni gaukara dainai, gorere dainai, idia hoia gaudia edia davana dainai, bona tanobada dekenai idia vara gaudia dainai.” Gabu iboudiai dekenai, taunimanima idia diba lasi mauri be do edena bamona. Dina ta ta ai, ita Iehova ena Witness taudia be iseda haroro gaukarana lalonai, unai bamona taudia ita davaria. Idia davaria hekwakwanai ita davaria danu, to iseda abidadama Dirava ena Hereva dekenai dainai, iseda lalohadai mauri dekena bona nega vairai totona be idau.—Isa. 65:13, 14, 17.
2 Ita daradara lasi bona ita abia dae gabeai namo do ia vara dainai, kudou namo taudia momo ese iseda sivarai idia kamonai henia. Lalo-metau bona hisihisi idia davaria taudia be ita ida idia herevahereva neganai, edia hemami ia namo. Badina idia kamonai gaudia be namo, bona haida idia ura ita ida Baibel stadi karana idia matamaia. To, nega haida, reana idia ura edia hekwakwanai idia herevalaia guna. Ita ura nega haida ita atoa unai taudia edia hekwakwanai kamonai henia totona, to iseda tahua gauna be taunimanima dekenai Baibel amo idia mai hereva momokanidia ita hadibadia.
3 Ita ura unai metau idia huaia taudia ita hebogahisi henia. Iesu be haheitalai namona badina Mataio 11:28 ai iena hereva be inai: “Tauanina manokamanoka bona gaukara metau taudia ibounai, lau dekenai umui mai.” Ia hegeregerena, ita ura taunimanima ita hagoadaia. To, siri 28 ena doko kahana oi itaia, Iesu ia hereva, ia gwau: “Lau ese laga-ani do lau henia umui dekenai.” Unai be iseda tahua gauna. Baibel amo idia mai gwauhamatadia ita herevalaia neganai, edia hekwarahi amo idia laga-ani. Edia hereva ita kamonai henia neganai, ia hahedinaraia idia ita laloa bada bona ita hebogahisi henia. Unai be gau badana Basileia ena sivarai namona harorolaia gaukarana ita hagugurua totona, bona taunimanima ita durua bena idia diba edia hekwakwanai ia hanamoa gauna tamona sibona be unai Basileia.—Mat. 24:14.
4 Iseda gaukara be doketa ena gaukara bamona lasi. To, Paulo be 1 Timoteo 4:6 ai ia hahedinaraia iseda hesiai gaukara ena badina be Baibel lalonai idia noho hahediba herevadia ita “hadibaia.” Edia mauri o edia mamina ia namo lasi taudia ita hagoadaia Iehova dekenai idia tabekau. Idia do ita hagoadaia Basileia ena helaro gaudia—‘guba gaudia do idia laloa’ totona. (Kol. 3:2) Dirava ena Hereva idia laloa noho neganai, ia be mai ena siahu dainai edia mauri do ia hanamoa.—Heb. 4:12.
5 Unai dainai, iseda tahua gauna be taunimanima ita durua ‘kara namodia, kara goevagoeva, lalokau karadia, bona taunimanima namodia matauraia karadia’ idia laloa goadagoada totona. (Fil. 4:8) Bema Basileia helarona idia laloa goada, ita abia vadaeni hahenamo do idia abia danu. Inai diba idia abia neganai do idia moale danu, Iehova ena Basileia ese edia hekwakwanai iboudiai do ia hanamoa.—Sal. 145:16.