Buka Helaga Ibounai be mai Ena Siahu Taunimanima Ia Hadibaia
1 Baibel ena namo idia hepapahuahulaia taudia be momo. To, ita diba unai buka ena rau lalodiai taunimanima edia hekwakwanai hanamoa daladia bona iseda mauri lalonai hakaua dalana maorona ita davaria diba. (Aon. 3:5, 6) Ma haida be edena bamona ita durua diba bena unai buka be idia atoa gabuna amo idia kokia, idia duahia namonamo, bona ia lalonai ia noho hereva momokani namodia idia dibaia? Reana henunai ai torea daladia do oi gaukaralaia diba November lalonai Hadibaia Tauna, Maino bona Noho Namona, Hereva Momokanina, bona Memero Kekeni bukadia, idia hani edia davana be K1.00, oi hariharilaia neganai.
2 Matamata taudia momo be edia mauri gaudia abia totona idia lalohekwarahi dainai, reana inai bamona hereva do idia kamonai:
◼ “Matamata taudia lau hereva henia neganai idia momo ese kohu idia tahua goadagoada. Idia moale lasi badina ma haida be mai edia kohu momo, to idia be moni lasi unai gaudia hoia totona. Unai bamona lalohadai dekenai sisiba hereadaena be edena gabu amo ita abia diba? [Haere naria.] Lau davaria Baibel be sisiba namona ia henia, hekwakwanai idauidau ita hanaia totona. Haheitalai ta do lau hahedinaraia.” Memero Kekeni bukana oi kehoa, rau 166-7 dekenai bena paragraf 3 bona 4 oi duahia. Rau 170 ai, paragraf 12 ai idia noho herevadia haida oi kikilaia diba, bena unai buka bona ma toi oi hariharilaia, davana be K1.00. Oi hahedinaraia ruma bese taudia ta ta totona, buka ta ta be mai edia namo. Nega umui abia hidi do oi lou henia totona bena edena dala ai Dirava hesiai henia gaukarana amo moale ita davaria diba do umui kikilaia.
3 Reana inai hereva dalana oi lalohadailaia:
◼ “Niuspepa ita duahia o reidio ita kamonai henia negadia ibounai, ita ia hagaria hekwakwanai ma ta ita itaia. [Niusi ia ripotilaia hekwakwanai oi gwauraia.] Unai bamona hekwakwanai edena bamona ita haheaukalaia diba? [Haere naria.] Nega ta, United States ena presiden ta ia gwau Baibel ena sivarai ese idia torea sivarai ibounai edia anina ia hereaia momokani, bona ‘ia lalonai be taunimanima idia mamia hekwakwanai iboudiai edia hanamoa daladia.’ Iena hereva dainai Baibel sibona ia gwauraia gauna ita laloatao. [Timoteo iharuana 3:16, 17 duahia.] Do lau hahedinaraia dahaka dainai Baibel ita abidadama henia diba.” Pepapepa ta Bible Oi Abidadama Henia Diba ena hereva badadia oi hahedinaraia. [Ruma tauna dekenai kopi ta oi henia.] Tanobada ai hari idia vara gaudia ese Baibel ena peroveta herevadia idia hagugurua noho oi kikilaia, bona Hereva Momokanina bukana, rau 5-7 amo, eiava Maino bona Noho Namona bukana, rau 82-3 amo, hereva haida oi gaukaralaia. Buka hani oi hariharilaia nega tamona ai, edia davana be K1.00. Oi hahedinaraia lagani idauidau taudia, bona ruma bese taudia idauidau ese unai buka do idia moalelaidia. Gabeai do oi giroa bona hari iseda nega lalonai Baibel ena peroveta herevadia hegeregerena idia vara gaudia do umui kikilaia totona, nega umui abia hidi.
4 Iseda Hadibaia Tauna Badana be dala ia kehoa dainai, iena ura idia ura dibaia taudia ese unai diba idia abia. November lalonai, mai goada ida Hadibaia Tauna, Maino bona Noho Namona, Hereva Momokanina, bona Memero Kekeni bukadia oi hariharilaia bona unai Baibel laiberi maragina ese famili taudia ibounai do ia durua. Ma haida be Baibel ena namo idia laloa bada totona ita durudia be gaukara hereadaena; idia do ia hamauria diba.—Aon. 1:32, 33.