Haroro Sikuli amo Hahenamo Abia Daladia—Kahana 2
1 Emui “Lagani 1996 Ena Haroro Sikuli Ena Sediual” ena karaia dalana umui duahia vadaeni, a? Idia haidaua gaudia oi itaia vadaeni, a? January ia lao April ai, Hereva Namba 3 be Bible Ena Hereva Badadia buklet amo, bona May ia lao December ai, idia halasia Diba bukana amo do idia karaia. Hereva Namba 4 be Buka Helaga Herevalaia bukana amo do idia karaia.
2 Hereva Henia Taudia: Taihu ta ese Hereva Namba 3 do ia karaia. Bible Ena Hereva Badadia buklet amo herevana ia karaia neganai, ruma-ta-ruma-ta gaukara eiava nega o gabu idaudia ai ia haroro bamona dalanai ia karaia. Diba bukana amo ia karaia neganai, namona be lou henia eiava Baibel stadi bamona ia karaia. Unai be karaia dalana namona, badina be Diba bukana do ita gaukaralaia momo Baibel idia ura stadilaia taudia ida.
3 Bema edia karaia dalana be Baibel stadi idia karaia, taihu ruaosi idia helai diba. Hamatamaia herevana kwadogina karaia, bena maoromaoro stadi oi hamatamaia bona idia torea henanadai oi henia. Namona be durua taihuna ena kara be ruma tauna ena hegeregerena. Idia noho Baibel siridia idia tahua bona duahia, edia nega hegeregerena. Namona be hereva henia taihuna ese hahediba daladia namodia ia gaukaralaia; henanadai ia henia bona siri edia anina ia hahedinaraia.
4 Bema Baibel siri momo herea idia noho bona miniti ima lalonai ibounai ia kikilaia diba lasi, dahaka do ia karaia? Hereva badadia idia hahedinaraia siridia sibona ia abia hidi. Bema siri be momo lasi, hereva badadia do ia kikilaia badabada. Nega haida, buka amo paragraf ta o hereva haida do ia duahia bona ruma tauna ida ia herevalaia.
5 Diba bukana ena karoa ibounai edia dokona ai, maua ladana “Emu Diba Oi Tohoa,” be hereva ia henia pablisa ese ia riviulaia, bema ena hereva be karoa ena paragraf ginigabedia amo. Bema nega ia hegeregere, paragraf dekenai idia noho hereva ma haida mauadia idia kikilaia diba danu. Bema hereva ma haida mauana be hereva do idia henia taihudia rua edia kahana ia kikilaia, kahana ginigunana ia henia taihuna ese do ia gaukaralaia be namo. Buka ena laulau oi gaukaralaia bema emu hereva idia hahedinaraia namonamo.
6 Tadikaka ta eiava taihu ta ese Hereva Namba 4 do ia karaia. Unai hereva be Buka Helaga Herevalaia bukana amo. Tadikaka ta ese ia karaia neganai, helai taudia dekenai hereva do ia henia. Namona be ena hereva ia hegaegaelaia neganai, Kingdom Hall dekenai do idia mai taudia ia laloa, unai amo kamonai taudia be iena hereva amo diba do idia abia bona ena namo do idia abia. Taihu ta ese unai kahana ia abia neganai, namona be Hereva Namba 3 hegeregerena ia karaia.
7 Bema sikuli dekenai hadibaia dalana ena kahana ibounai edia namo ita abia, “hadibaia” karana namona ena dala ai ‘sivarai namona do ita harorolaia.’—2 Tim. 4:2.