Buka Gunadia Gaukaralaia Namonamo
1 Iehova ese mai digara lauma aniani momo ita ia henia. Nega momo unai aniani be guna idia halasia rau 192 bukadia dekenai. January lalonai ita ese Hadibaia Tauna Badana Ita Kamonai Henia, Maino bona Noho Namona—Daika Amo Ia Mai?, Mauri ia lao henia Hereva Momokanina, bona Memero Kekeni—Moale Umui Davaria Dalana bukadia nega tamona ai do ita hariharilaia, bona edia davana be K1.00. Oiemu kiki herevana oi hegaegaelaia neganai, buka ena hereva tamona sibona oi hahedinaraia namonamo be namo. Edena bamona oi karaia diba?
2 Hegaegae Dalana: Gau ginigunana be buka ena hereva ta oi abia hidi, oiemu teritori dekenai kudou-namo taudia do idia ura henia gauna. Hari, hamatamaia herevana oi laloa be namo; oiemu gabu dekenai ia vara sivarai ta, o nius dekenai oi kamonai gauna be ruma tauna ida nega sisina lalonai oi kikilaia, bena oi abia hidi vadaeni kahana buka dekenai oi hahedinaraia. Reana Baibel siri ta, unai buka amo o emu Baibel amo, oi duahia emu hereva hamomokania totona. Bena nega tamona ai buka oi hariharilaidia, davana be K1.00. Namona be henanadai o hereva ta be ruma tauna dekenai oi gwauraia, bena unai do oi gaukaralaia lou henia oi karaia totona.
3 Namona be emu teritori dekenai idia noho matamata taudia hereva henia totona Hadibaia Tauna Badana Ita Kamonai Henia, bona Memero Kekeni—Moale Umui Davaria Dalana bukadia oi hegaegaelaia. Buka haniosi oi hariharilaia davana be K1.00, to matamata taudia oi hagoadaia ataiai buka rua amo ta idia abia hidi bona duahia be namo.
4 Bema “Maino bona Noho Namona—Daika Amo Ia Mai?” bukana oi hariharilaia toho, reana rau 4 ena laulau oi hahedinaraia bona oi gwau:
◼ “Inai ese Baibel ia hadibaia helarona, tanobada dekenai Dirava ese do ia hagugurua palanina, ia laulaulaia. Bema oi bona emu ruma bese be tanobada paradaisona dekenai do umui noho diba, dahaka oi laloa ia vara guna be gau badana? [Haere naria.] Baibel ia hahedinaraia tanobada hegegemadai maino bona noho namona be kahirakahira do idia vara bona Paradaiso ai do ia lao lou. [Salamo 37:10, 11 duahia.] Inai buka ese oi dekenai do ia hahedinaraia dahaka oi karaia diba Dirava ena hahenamo abia totona. Hari ia bona inai buka toi ai hariharilaia, edia davana be K1.00 sibona.
5 Bema “Hereva Momokani” bukana oi hariharilaia, reana oi gwau:
◼ “Tanobada hegegemadai, ena be taunimanima milioni momo idia hekwarahi bada moale korikorina davaria totona, to idia davaria diba lasi. Momo idia laloa lagani haida do idia mauri, natudia do idia havaraia, bona reana noho namona sisina idia moalelaia ela bona mase ese idia ia abia.” Rau 65, paragraf 1 ia lao 3 ena hereva haida oi kikilaia, Salamo 37:10, 11 oi duahia, bona nega sisina lalonai oi hahedinaraia Dirava ena ura be tanobada matamatana ia karaia, rau 4 ena laulau ese ia hahedinaraia bamona paradaisona. Ruma tauna ena lalohadai oi tahua inai henanadai amo: “Inai laulau oi itaia neganai, dahaka oi laloa?” Iena haere oi naria. Buka oi hariharilaidia bona inai henanadai, “Dahaka dainai Dirava lalokauna ese hari kara dika ia koua lasi?” do umui herevalaia negana umui gwauraia.
6 Iseda buka bona magasin ese taunimanima tausen momo idia hagoadaia Baibel idia stadilaia totona. Idia dibaia gaudia dainai, nega vaira totona helaro namona idia abia. (Sal. 146:5, NW) Kamonai taudia ita durudia be iseda hahenamo badana.
This is a partial repeat of article in km 1/95 taken from part of km-E 1/95, “Making Good Use of Our Older Books.”