Lou Henia, Edia Ura Habadaia Totona
1 Lou henia namodia ita karaia neganai, ruma tauna ena lalona ita veria bona ena diba ita habadaia noho, abidadama tauna ta ai do ia lao totona. Guna idia kamonai taudia oi lou henia neganai, dahaka heduru herevadia haida oi laloatao be namo?
2 Gau ginigunana be oi hegaegae namonamo. Unai oi karaia matamaia kamonai ruma tauna oi davaria negana ginigunana ai. Edena bamona? Oi rakatania neganai, gau ibounai be emu noutbuk lalonai oi torea namonamo. Hegeregere, iena ladana, umui kikilaia herevana, ena lalohadai unai hereva dekenai, bona edena buka o magasin ia abia. Oi do lou henia lasi neganai, namona be oi torea gaudia oi riviulaia, bona do oi gwauraia herevadia oi laloa mai guriguri danu.
3 Hari oi hegaegae. Dahaka do oi gwau? Nega ginigunana ruma tauna oi hereva henia neganai bema henanadai ta oi gwauraia, oi lou henia neganai unai hereva oi habadaia diba. Hegeregere, bema guna umui be Dirava ena Basileia ena hahenamo umui kikilaia, inai henanadai oi henia diba, “Dahaka dainai Dirava ese kara dika ia do koua lasi?”
Oi giroa neganai, ia oi hanamoa murinai, reana oi gwau diba:
◼ “Vanegai, ita be lalokau Diravana ese hari inai negai kara dika ia do koua lasi ena badina ita kikilaia. Oiemu lalohadai ma haida unai hereva dekenai idia noho, a? [Haere naria.] Oi laloa Dirava ese momokani taunimanima ia lalodia bada, a? [Haere naria.] Namona be Baibel ena hereva Ioane 3:16 ai ita itaia.” Unai siri oi duahia murinai, Hereva Momokani bukana ena karoa 8 lalonai idia noho herevadia haida oi hahedinaraia. Idia hahedinaraia dahaka dainai Dirava ese kara dika ia do haheaukalaia noho.
4 “Maino bona Noho Namona—Daika Amo Ia Mai?” bukana ia abia dae tauna oi lou henia neganai, reana rau 4 ena laulau oi herevalaia bona ia oi nanadaia:
◼ “Lau rakatania buka oi itaia, bona Dirava ia gwauhamatalaia tanobada paradaisona oi laloa. Dirava ese taunimanima dekenai unai gwauhamata ia henia dainai, dahaka oi laloa?” Iena haere oi kamonaia bona oi kikilaia nega sisina murinai, karoa 2 bona 3 oi herevalaia bona taunimanima, tomadiho taudia danu, ese maino bona noho namona idia havaraia lasi ena badina oi kikilaia.
5 To oi naria namonamo. Ta oi lou henia neganai, do oi henia henanadaina oi laloa namonamo guna. Namo lasi oi gwau, “Guna oi lau henia buka oi duahia vadaeni, a?” eiava “Lau oi laloatao, a?” eiava “Guna lau mai neganai ita kikilaia herevana be oi laloatao, a?” Unai ese ruma tauna ia hahemaraia diba. Unai bamona henanadai ese anina namona idia havaraia lasi. Namona be ruma tauna oi gado namo henia, mai emu aonega ida oi hereva henia, bona oi hereva daudau lasi. Unai kara ese emu sivarai ena namo do idia habadaia.
6 Unai dala bona daladia ma haida oi gaukaralaia diba, kamonai taudia edia lalona veria totona, bena unai sivarai do idia laloa bada. Namona be dala oi tahua, pura ta ta ai lou henia tamona o ma haida do oi karaia totona. Inai heduru herevadia oi badinaia, bona lo pablisa taudia oi tahua oi do idia durua totona. Kamonai tauna oi davaria murinai lou henia namodia karaia karana amo ena ura oi habadaia neganai, oiemu moale do ia bada ia lao danu.
This is a repeat of article in km 2/94 taken from km-E 1/94 “Returning to Build Appreciation.”