Iesu Hegeregerena, Dina Ta Ta ai Hereva Momokani Harorolaia
1 Iesu ia mai tanobada dekenai gaukara ta ia hagugurua totona. Ena gaukara badana be inai: ‘Hereva momokani gwauraia hedinarai totona ia mai.’ (Ioa. 18:37) Ena Tamana ena kara namodia bona ena ura ia harorolaia. Unai gaukara be ena aniani bamona; ia be ena mauri ena badina. (Ioa. 4:34) Luka ia gwau: “Dina ibounai Dubu Helaga lalonai Iesu ese ia hadibaia karaia.” (Luka 19:47) Iesu be ena nega ia halusia kava lasi. (Ioa. 9:4) Iena mase be kahirakahira neganai, ena Tamana ia hamaoroa diba: “Lau ese tanobada dekenai oi lau hanamoa vadaeni, lau dekenai gaukara oi henia danu be lau karaia haorea vadaeni.”—Ioa. 17:4.
2 Iehova ia karaia karadia dainai, mai iseda kudou ibounai ida ia ita tanikiu henia bona dina ibounai ita ura Ia ita kikilaia. Iesu ena hahediba taudia hegeregerena, mai gari lasi do ita gwau: “Ai itaia bona ai kamonai gaudia ai hunia diba lasi, aiemai uduna ai koua diba lasi.” (Kara 4:20) Iehova herevalaia karana idia karaia hanaihanai, badina Baibel ia gwau “dina ibounai . . . inai gaukara idia hadokoa lasi.” (Kara 5:42) Sibona ita nanadaia, ‘Egu Hadibaia Tauna Iesu, lau tohotohoa, a?’
3 Haroro Goadagoada: Iesu ia peroveta, ia gwau, Basileia ena sivarai be tanobada ibounai dekenai idia harorolaia murinai, “dokona be do ia ginidae.” (Mat. 24:14) Unai dainai namona be unai mai anina haroro gaukarana ita karaia goadagoada. Unai gaukara ese taunimanima milioni momo ia hamauria diba dainai, ma gaukara ta ena namo ese unai gaukara ena namo ia hanaia lasi. Kahirakahira inai tanobada ena oromana dikana do ia ore dainai, inai gaukara haorea negana be kwadogi sibona!
4 Ai abia ripoti ese idia hahedinarai Iehova be mamoe haboua gaukarana ia haharagaia. (Isa. 60:22) Tanobada ena kahana idauidau dekenai, taunimanima be hereva momokani dekenai idia aru mai, bona mai edia moale ida idia gwau: ‘Umui danu do ita lao, badina be ai be ai kamonai vadaeni, Dirava be umui dekenai ia noho.’! (Sek. 8:23) Hari iseda negai Iesu ena hereva be mai anina bada, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mat. 9:37, 38) Iesu ena hahediba taudia be “Dubu Helaga dekenai . . . nega ibounai Dirava idia hanamoa” hegeregerena, iseda hesiai gaukara ita karaia mai iseda goada ida be namo, ani?—Luka 24:53.
5 Dina Iboudiai Hereva Momokani Hahedinaraia: Dina iboudiai, hereva momokani harorolaia daladia ita tahua be namo. Dala momo idia noho. Miniti haida oi gaukaralaia diba turana o guna oi davaria tauna ta, oi laloa ia ura hereva momokani ia kamonai tauna, oi rini henia totona, a? Eiava oi davaria diba lasi tauna dekenai revareva ta oi torea diba, a? Sitoa dekenai oi lao neganai, sitoa naria tauna dekenai pepapepa ta oi hariharilaia toho, a? Reana emu helaro namona harorolaia daladia ma haida oi laloa diba. Bema mai emu gari lasi ida oi karaia toho, Iehova ese oi do ia durua.—1 Tes. 2:2.
6 Dina ta ta iboudiai idia hamatamaia neganai, namona be sibona ita nanadaia, ‘Bema haroro dalana ia kehoa, mai gari lasi ida do lau gaukaralaia, a?’ Iesu ena laloa dalana ita tohotohoa be namo, tanobada dekenai ia mai ena badina ia hahedinaraia, ia gwau: “Dirava ena Basileia ena Sivarai Namona . . . do lau harorolaia.” (Luka 4:43) Bema iseda Hadibaia Tauna ita ura ita tohotohoa, ia hegeregerena do ita karaia.—Luka 6:40.