Abidadama Dekena amo Ita Raka
1 Taunimanima milioni momo edia mauri lalonai kohu idia laloa bada, aonega lasi dalanai kohu ena siahu koikoina idia abidadama henia. (Mat. 13:22) Unai be dala aukana ai idia davaria edia kohu be ia boio eiava ta ese ia henaoa eiava kohu ese sisina sibona idia ia durua neganai. To, Baibel ese ita ia hagoadaia aonega dalana ita abia hidi totona, lauma kohu haboua totona do ita hekwarahi. (Mat. 6:19, 20) Ena anina be “abidadama dekena amo ita” raka.—2 Kor. 5:7.
2 Inai hereva “abidadama” be Greek herevana ta amo idia hahanaia, ia hahedinaraia lalohadaina be inai, diba momokani, abidadama henia, abia dae vaitani. Abidadama dekenai ita raka ena anina be hekwakwanai negadiai Dirava ita abidadama henia, ita diba momokani ia be hegeregere iseda raka dalana do ia hakaua bona ita diba ia ura ita ia naria. Iesu be haheitalai goevadaena; ia ese gau badadia ia laloa bada. (Heb. 12:2) Unai hegeregerena, namona be iseda kudouna ai, matana amo ita itaia lasi gaudia, lauma gaudia unai, ita laloa noho. (2 Kor. 4:18) Namona be ita laloatao hari inai negai iseda mauri lalonai dahaka do ia vara ita diba lasi bona ita abia dae Iehova dekenai ita tabekau vaitani be gau badana.
3 Danu, namona be ita abia dae vaitani Iehova ese ena tanobada oreana amo ita ia hakaua noho, “hesiai tauna mai ena kamonai, bona mai ena kara maoromaoro” ese ia gaukaralaia oreana unai. (Mat. 24:45-47) Kongregesen ‘idia hakaua taudia ita kamonai henia’ neganai iseda abidadama ita hahedinaraia. (Heb. 13:17) Mai eda manau ida tiokratik dalana ita badinaia ese ia hahedinaraia Iehova ita abidadama henia momokani. (1 Pet. 5:6) Namona be mai eda kudouna ibounai ida orea ia karaia gaukarana ita durua. Unai ese ita bona iseda tadikaka do ia haboua lalokau bona lalo-tamona dekenai.—1 Kor. 1:10.
4 Abidadama Hagoadaia Daladia: Namo lasi iseda abidadama be noho kava gauna bamona ai ia lao. Namona be ita hekwarahi ia goada ia lao totona. Hanaihanai ita stadi, guriguri, bona hebou dekenai ita lao ese ita ia durua iseda abidadama ita hagoadaia, bena, Iehova ena heduru amo, hahetoho iboudiai lalonai do ita goada noho. (Ef. 6:16) Dina ta ta Baibel oi duahia bona hebou totona oi hegaegae loulou, a? Nega momo oi dibaia gaudia oi laloa dobu, bona Iehova oi guriguri henia, a? Hebou iboudiai dekenai oi lao bona dala ia kehoa neganai oi haere, a?—Heb. 10:23-25.
5 Kara namodia ese abidadama goadana idia hamomokania. (Iam. 2:26) Iseda abidadama ita hahedinaraia dalana badana be iseda helaro be taunimanima dekenai ita gwauraia. Dala oi tahua sivarai namona oi harorolaia totona, a? Oiemu mauri oi haidaua diba, oiemu haroro gaukara ena nega oi habadaia totona, a? Ita abia sisiba oi badinaia, oiemu haroro gaukara oi hanamoa totona bona ia havaraia anina habadaia totona, a? Oi ese lauma dalanai do oi tahua gaudia oi abia hidi bona oi hekwarahi oi davaria totona, a?
6 Iesu ese sisiba ia henia mauri gaudia ita laloa momo garina bona kohu eiava sibona ena namo tahua karana ese iseda lauma lalohadaina ia hadiburaia garina. (Luka 21:34-36) Iseda kara ita naria namonamo, iseda abidadama ita hadikaia lasi totona. (Ef. 5:15; 1 Tim. 1:19) Ita iboudiai iseda ura badana be dokonai ita gwau diba ‘tuari namona ita tuarilaia vadaeni, iseda heau helulu be ia ore vadaeni, bona iseda abidadama ita karaia haorea vadaeni.’—2 Tim. 4:7.