Hereva Namona Bona Kara Namona Haheitalaia
1 Aposetolo Paulo ese Timoteo ia hagoadaia hereva namona bona kara namona ia haheitalaia totona. (1 Tim. 4:12) Namona be ita danu be unai bamona ita karaia, bona iseda haroro gaukara lalonai unai be mai anina bada, badina unai karadia amo ita davaria taudia edia kudouna ita veria eiava lasi.
2 Namona be kara namo ena kahana iboudiai ita hahedinaraia, hegeregere hemataurai, taunimanima edia namo tahua, hebogahisi, manau, bona gado-namo. Unai amo, ita hahedinaraia ita diba iseda kara be mai anina ma haida edia hemami dekenai. Haroro gaukara lalonai kara namo edia anina be hegeregere aniani dekenai gau namodia ita atoa ena mamina hanamoa totona. Bema unai gaudia idia noho lasi, reana tauanina ia hagoadaia aniani ena mamina be namo lasi bona ita ura henia lasi. Taunimanima ita kara henia neganai bema kara namo ita hahedinaraia lasi, idia danu be do idia ura lasi kamonai.—Kol. 4:6.
3 Hereva Namona Haheitalaia: Kiri bona hanamoa hereva namona be iseda sivarai namona harorolaia gaukarana ena anina bada gaudia. Bema iseda hamatamaia herevana be hebogahisi bona lalo-momokani ida ita hanamoa, ruma tauna ese do ia mamia mai momokani ida ia ita laloa. Ia hereva neganai, oi kamonai namonamo bona ena lalohadai oi matauraia. Oi hereva neganai, mai gado-namo bona mai manau ida oi hereva.—Kara 6:8 itaia.
4 Nega ta ta ita ia dadaraia tauna ita davaria, reana ia badu danu. Dahaka do ita karaia? Petero ese ita ia hagoadaia iseda hereva amo “mataurai bona manau” ita hahedinaraia. (1 Pet 3:15; Roma 12:17, 18) Iesu ia gwau bema ruma tauna be hebogahisi lasi ida Basileia ena sivarai ia dadaraia, ita ese ‘iseda aena dekenai ia noho momoru ita negea oho unuseni’ sibona. (Mat. 10:14) Unai bamona ia vara negadiai kara namo ita hahedinaraia ese reana gabeai ita ia dadaraia tauna ena kudouna do ia veria.
5 Kara Namona Haheitalaia: Dala ai bona taunimanima momo idia hebou gabudia ma haida dekenai sivarai namona ita harorolaia neganai, gau badana be taunimanima edia namo ita tahua, rege bada ita havaraia lasi bona ta ia ura lasi neganai ita doria lasi, bona idia raka loaloa taudia edia dala ita koua lasi. Kamonai taudia edia ruma dekenai ita noho neganai, namona be ita kara namo vadivadi taudia namodia bamona, bona ita hahedinaraia noho edia heabidae karana ita laloa bada. Namona be ita idia bamoa natudia ese ruma tauna bona ena kohu idia matauraia bona ita herevahereva neganai idia kara namo bona idia kamonai. Bema natudia edia kara ia namo lasi, ruma tauna ese lalohadai dikana do ia abia.—Aon. 29:15.
6 Namona be iseda toana ese ia hahedinaraia ita be Dirava ena Hereva harorolaia taudia. Namo lasi iseda dabua bona huina edia toana be dika eiava davana bada gaudia ita karaia. Iseda toana be Sivarai Namona ena dala hegeregerena be namo. (Filipi 1:27 itaia.) Iseda toana bona ita gaukaralaia gaudia ita laloa namonamo neganai, ta ita hahekwakwanaia lasi bona iseda haroro gaukarana idia gwauraia dika lasi. (2 Kor. 6:3, 4) Ita ese hereva namona bona kara namona ita haheitalaia dainai, taunimanima ese Basileia ena sivarai idia ura henia bona Iehova idia hanamoa.—1 Pet. 2:12.