Henanadai Mauana

◼ Hebou dekenai paragraf idia duahia tadikaka be dahaka idia laloatao be namo?

Gima Kohorona Stadi bona Kongregesen Buka Stadi totona idia atoa nega ena kahana badana be paragraf duahia totona ita gaukaralaia. Unai ena anina be duahia tadikakana ese hadibaia tauna ena maduna badana ia huaia. Gau badana be ia duahia dalana ese ia duahia herevana ‘ena anina ia hahedinaraia namonamo’ bena unai amo kamonai taudia ese do idia lalo-pararalaia sibona lasi to do ia veridia idia badinaia danu. (Neh. 8:⁠8) Unai dainai, duahia tauna ese ena gaukara totona ia hegaegae namonamo be namo. (1 Tim. 4:​13; Haroro School ena stadi namba 3 itaia.) Taunimanima vairanai anina ia hedinarai namonamo duahiduahi ena anina bada gaudia haida be inai:

Dala Maorona ai Gado Regena Oi Haidaua: Namona be oi laloa guna edena hereva eiava hereva edia orea oi duahia neganai emu gadona ena regena oi haidaua, kamonai taudia ese anina maorona idia abia totona.

Hereva Oi Gwauraia Maoro: Hereva oi gwauraia maoro bona goeva be mai anina bada kamonai taudia ese buka lalonai idia noho hereva idia lalo-pararalaia totona. Oi diba lasi hereva bona nega haida sibona ita gaukaralaia hereva be dikseneri lalonai oi tahua eiava Society ese ia karaia kaset teipi oi kamonai.

Mai Gado Regena Bada Bona mai Lalo-Siahu ida Oi Hereva: Mai lalo-siahu ida oi hereva ese lalona ia veria, hemami ia hanogaia, bona kamonai taudia ia hagoadaia idia badinaia totona.

Mai Lalo-Namo ida Bona Herevahereva Bamona: Mai manada ida oi duahiduahi neganai, herevahereva bamona oi karaia diba. Bema ia hegaegae bona karaia loulou, duahia tauna ia gari lasi, bona ena duahiduahi be idia ura kamonai, idia hesikulaia lasi.​—Hab. 2:⁠2.

Idia Printaia Hegeregerena Oi Duahia: Futnout bona inai bamona maka ( ) eiava [ ] lalonai idia atoa gauna oi duahia danu bema ia ese idia printaia hereva ena anina ia hahedinaraia goevagoeva. Bema idia gaukaralaia buka sibona ia gwauraia, unai oi duahia lasi. Futnout be paragraf lalonai idia makaia gabuna ai oi duahia bona inai bamona oi hamatamaia: “Futnout ia gwau . . .” Oi duahia murinai, paragraf orena oi duahia.

Taunimanima vairanai ita duahiduahi namonamo neganai, ia be dala namona ta, ia amo Hadibaia Tauna Badana ese ia henia ‘hereva ibounai’ be ma haida dekenai ‘ita hadibaia.’​—Mat. 28:⁠20.

This article is repeated in km 5/98, 2/99.