Basileia Harorolaia
1 Heberu 10:23 ai, ita idia hagoadaia “iseda abidadama ita dogoatao goada noho.” Bona iseda abidadama ena anina korikorina be Dirava ena Basileia. Iesu ese sisiba ia henia unai Basileia ena sivarai namona be bese ibounai dekenai ita harorolaia. (Mar. 13:10) Haroro gaukara ita karaia neganai unai ita laloatao be namo.
2 Taunimanima ita davaria neganai, idia laloa bada gauna eiava idia lalohisihisilaia gauna amo iseda herevahereva ita hamatamaia toho. Nega momo idia diba gaudia ita gwauraia, hegeregere unai gabu dekenai idia vara raskol karadia, matamata taudia edia hekwakwanai, mauri durua gaudia edia davana ena hekwarahi, eiava tanobada ena dika ta. Taunimanima ese “tanobada ena laloa metau momo gaudia” idia laloa bada dainai, bema ita hahedinaraia idia ita laloa bada bona edia hekwarahi ita lalo-pararalaia, nega momo taunimanima ese edia lalona dekenai idia noho gaudia idia gwauraia. (Luka 21:34) Unai ese dala ia kehoa diba iseda abidadama ita gwauraia totona.
3 To, bema ita naria namonamo lasi, reana dika gaudia ita herevalaia momo bona iseda vadivadi ena badina—Basileia ena sivarai harorolaia—ita karaia lasi. Ena be hekwakwanai idia havaraia gaudia ita gwauraia, to ita ura gauna be edia lalona ita veria Basileia dekenai, ia ese taunimanima edia hekwakwanai ibounai do ia haorea. Iseda helaro be namo herea bona gau badana be taunimanima be do idia kamonai diba. Unai dainai, ena be “metau dikadia momo” negana ena hekwakwanai haida ita herevalaia guna, namona be iseda hereva badana, “noho hanaihanai Sivarai Namona,” be haraga ita gwauraia. Unai dalana ai, iseda hesiai gaukarana do ita karaia namonamo.—2 Tim. 3:1; 4:5; Apok. 14:6.