Hahegani Ita Abia
1 Iesu ese ia murinai idia raka taudia ia hagania ‘bese ibounai be diba tahua taudia ai do idia halaoa.’ (Mat. 28:19) Tanobada ibounai lalonai tano bona motumotu 232 dekenai, Iehova Dirava idia hanamoa taudia milioni ima mai kahana ese idia hamomokania noho Iesu ena hahegani ia guguru vadaeni. To ita ta ta be edena bamona? Iseda haroro haheganina ita laloa bada, a?
2 Kara Maoromaoro Taravatuna: Hahegani be “idia gwauraia gaukarana ta karaia totona idia henia taravatuna.” Keriso ese ita dekenai oda ia henia do ita haroro noho. (Kara 10:42) Aposetolo Paulo ia lalo-parara ia be mai ena oda, eiava mauri taravatuna, sivarai namona ia harorolaia. (1 Kor. 9:16) Haheitalai be inai: Mani oi laloa, oi be ia mutu noho bouti ena gaukara tauna ta. Gunalaia tauna ese oi dekenai oda ia henia guia taudia oi hadibaia bona oi hamaorodia bouti maragidia dekenai do idia lao. Unai hahegani do oi kamonai henia lasi bona sibona hamauria totona oi hekwarahi, a? Lasi momokani. Ma haida ese oi idia abidadama henia. Edia mauri idia haboioa diba. Oi be kara maoromaoro taravatuna henunai oi noho dainai idia durua gaukarana do oi karaia.
3 Dirava ese ita ia hagania taunimanima ita hadibaia dika idia davaria diba. Daudau lasi murinai Iehova ese inai tanobada oromana dikana ibounai do ia haorea. Taunimanima milioni momo do idia mase diba. Ia maoro bema taunimanima idia mase gwauraia be ita laloa lasi bona sibona eda hahemauri ita laloa sibona, a? Lasi momokani. Ma haida idia mauri totona ita durua ena kara maoromaoro taravatuna henunai ita noho.—1 Tim. 4:16.
4 Abidadama Haheitalai Ita Tohotohodia Totona: Peroveta tauna Esekiela ia diba kamonai lasi Israela taudia ia hadibaia be namo, unai be iena maduna badana. Iehova ese mai goada ida Esekiela ia hadibaia dahaka ia vara bema ena gaukara ia karaia lasi: “Bema lau gwau dika tauna ta be do ia mase, . . . Bema oi ese ia dekenai oi sisiba henia lasi, unai tau be iena kara dika dainai do ia mase. Bona lau be do lau gwau unai tau ena mase be oiemu kerere dainai.” (Esek. 3:18) Esekiela be mai ena kamonai ida ena gaukara ia hagugurua, taunimanima idia dagedage negadiai danu. Unai dainai, Iehova ena hahemaoro idia abia neganai, unai ia moalelaia diba.
5 Lagani handred momo murinai, aposetolo Paulo ese iena haroro maduna ia herevalaia. Ia gwau: “Kerere be lau lasi. Badina be Dirava ena ura ibounai umui dekenai lau hamaoroa, gau ta lau hunia lasi.” Paulo be taunimanima vairanai bona ruma ta ruma ta ai ia haroro, badina ia lalo-parara bema ia karaia lasi Dirava vairanai do ia kerere.—Kara 20:20, 26, 27.
6 Iseda goada be Esekiela ena hegeregerena, a? Ita ura haroro, Paulo bamona, a? Ita abia hahegani be idia abia hahegani hegeregerena. Herevana taunimanima idia ura lasi, idia laloa bada lasi, eiava idia dagedage henia, to iseda maduna, taunimanima ita hadibaia maduna unai, ita huaia noho be namo. Taunimanima tausen momo ese Basileia ena sivarai do idia abia dae diba bona idia gwau: ‘Mani emu kara, umui danu do ita lao, badina be ai be ai kamonai vadaeni, Dirava be umui dekenai ia noho.’ (Sek. 8:23) Namona be Dirava bona iseda dekena taudia ita lalokau henia mamina ese ita ia hagoadaia bena ita hesiku lasi. Ita abia haheganina be do ita haroro!