Hereva Momokani Oi Hadibaia Maoromaoro, A?
1 Tanobada dekenai idia noho hadibaia taudia amo Iesu Keriso be hadibaia tauna hereadaena. Iena hereva dalana ese taunimanima edia kudouna ia hamoalea, edia lalona ia hamarerea, bona idia ia hagoadaia kara namodia idia karaia totona. (Mat. 7:28, 29) Ia hadibaia negadia ibounai lalonai, Dirava ena Hereva ia gaukaralaia. (Luka 24:44, 45) Ia hahedinaraia ia diba gaudia ibounai bona ia hadibaia gaudia be Iehova Dirava amo ia abia. (Ioa. 7:16) Iesu ese hereva momokani hadibaia maoromaoro karana ia haheitalaia namo herea, ia murinai idia raka taudia dekenai.—2 Tim. 2:15.
2 Aposetolo Paulo danu be haheitalai namona, Dirava ena Hereva gaukaralaia namonamo karana dekenai. Ia ese Baibel siri taunimanima dekenai ia duahia sibona lasi; ia duahia gauna ena anina bona ena badina idauidau ia herevalaia, unai dala ai Dirava ena Hereva amo ia hamomokania Iesu be Keriso. (Kara 17:2-4) Unai hegeregerena, hereva namonamo hahediba tauna Apolo be “Buka Helaga ia diba momo,” bona hereva momokani ia harorolaia goadagoada neganai, Baibel ia gaukaralaia maoromaoro.—Kara 18:24, 28.
3 Dirava Ena Hereva Hadibaia Tauna ai Oi Lao: Hari inai negai idia noho Basileia harorolaia taudia ese anina bada idia havaraia badina kudou-momokani taudia idia hadibaia neganai, Baibel idia gaukaralaia bona ia amo badina idauidau idia herevalaia. Nega ta, tadikaka ta ese Esekiela 18:4 bona unai bamona siri ia gaukaralaidia pasto ta bona ena dubu taudia toi ida kara dika taudia bona kara maoromaoro taudia edia lao gabuna ia herevalaia neganai. Unai dainai, dubu taudia haida be idia stadi matamaia, bona idia ta be hereva momokani ia abia dae. Nega ma ta ai, taihu ta idia noia kamonai hahine ta ena adavana, hereva momokani ia dadaraia tauna dekenai Iehova ena Witness taudia ese Kerisimasi bona vara dinadia idia hahelagaia lasi ena badina ia hahedinaraia. Baibel ena haere be Herevalaia bukana amo maoromaoro ia duahia bona unai tau ia gwau unai haere ia abia dae vaitani. Unai ia moalelaia bada dainai ena adavana ia gwau: “Umui emui hebou dekenai do ai mai.” Bona ena tau ia gwau ia hegeregere!
4 Heduru Oi Gaukaralaia: Iseda Basileia Gaukara pepana bona Hesiai Hebou ena program ese heduru namona idia henia Dirava ena Hereva ita hadibaia maoromaoro totona. Pablisa taudia momo ese edia tanikiu herevana idia gwauraia, badina nega maorona ai ita abia bona anina idia havaraia haroro daladia idia halasia bona idia haheitalaia, ita idia durua totona. Buka Helaga Herevalaia bukana lalonai be lalohadai momo herea idia noho, Dirava ena Hereva ena hereva badadia 70 ia hanaia ita hadibaia namonamo diba totona. Diba ese Mauri Dekenai Ita Ia Hakaua Lao bukana ese Baibel ena hadibaia hereva badadia be dala kwadogi ai ia hahedinaraia, kamonai matamata taudia idia lalo-parara be namo gaudia unai. Haroro School Ena Buka ena stadi 14 bona 15 ese hadibaia tauna namona be hereva haida amo Baibel siri ia gwauraia dalana, ia duahia dalana, bona ia badinaia karana ia herevalaia dalana idia hahedinaraia. Namona be unai heduru ibounai ita gaukaralaia namonamo.
5 Dirava ena Hereva ita hadibaia maoromaoro neganai, do ita davaria “ia mauri noho, bona ia be mai ena siahu” bona ia ese ita haroro henia taudia edia ‘lalona bona edia kudouna ena ura ibounai ia tahua diba.’ (Heb. 4:12) Ia havaraia anina ita moalelaia dainai hereva momokani be mai goada bada ida do ita herevalaia!—Kara 4:31.