Do Idia Karaia Lou Lasi Gaukarana Karaia
1 Matamana amo ema bona hari, nega ta ta ai Iehova ese ena inai taudia edia davana ia henidia. To iena hebogahisi dainai, lalo-maoromaoro taudia hamauria dalana ia karaia. (Sal. 103:13) Edia kara iena hebogahisi dekenai hegeregerena, mauri eiava mase idia davaria.
2 Unai hegeregerena, Abata Badana be lagani 2370 B.C.E. lalonai ia do vara lasi neganai, Noa ese “kara maoromaoro ia harorolaia” guna. Unai abata lalonai idia mase taudia be Dirava ena sisiba badinaia lasi taudia. (2 Pet. 2:5; Heb. 11:7) Ierusalema be lagani 70 C.E. lalonai idia do hadikaia ore lasi neganai, Iesu ese haida be unai dika amo do idia roho mauri dalana be ia gwauraia hedinarai goevagoeva guna. Iena sisiba herevana idia dadaraia taudia iboudiai ese dika idia davaria. (Luka 21:20-24) Matamana negana amo ema, nega momo Dirava ese taunimanima unai bamona ia sisiba henidia guna bena edia davana ia henidia.
3 Taunimanima Sisiba Henia Gaukarana Hari Inai Negai: Idaunegai Iehova ia gwau iena badu be hari inai nega ena oromana dikana latanai do ia bubua bona manau taudia sibona be unai dika amo do idia roho mauri. (Sep. 2:2, 3; 3:8) Inai sisiba herevana harorolaia gaukarana ena nega be kahirakahira do ia ore! Nega daudau lasi murinai “hisihisi bada herea” do ia vara, bona manau taudia be hari idia gogoa noho. Momokani, “uma gabu” dekenai “anina be idia auka bona mage vadaeni, utua nega danu ia hegeregere.” Unai dainai, unai gaukara be mai anina bada herea bona ita karaia haraga, ia ese ma gaukara iboudiai ia hereaia.—Mat. 24:14, 21, 22; Ioa. 4:35.
4 Namona be hari inai negai taunimanima do ita sisiba henia, herevana ‘do idia kamonai o do idia kamonai lasi.’ Dirava ese unai gaukara be ita ia henia, bona namo lasi unai gaukara ita laloaboio. (Esek. 2:4, 5; 3:17, 18) Unai gaukara ita goadalaia neganai, ita hahedinaraia goevagoeva Dirava ita lalokau henia, iseda dekena taudia edia namo ita tahua momokani, bona iseda Hahemauri Tauna, Iesu Keriso, ita abidadama henia mai eda goada ida.
5 Kara Karaia Negana be Hari: Gunaguna Iehova ese davana ia henia negadia murinai, kara dika ia vara lou, badina be Satani bona ena demoni be idia do gaukara noho dainai. To inai nega be do ia idau. Satani ena siahu do idia haorea. Tanobada ibounai lalonai “hisihisi badana” ta be ia kahirakahira ena sivarai do idia harorolaia be anina lasi. (Apok. 7:14, NW; Roma 16:20) Ita be mai eda hahenamo badana; gauna be do idia karaia lou lasi gaukarana be hari ita karaia. Namona be unai gaukara be hari do ita goadalaia momokani.
6 Aposetolo Paulo ese ena haroro gaukarana ia herevalaia mai ena lalo-goada ida, ia gwau: “Bema umui ta ia boio, kerere be lau lasi.” (Kara 20:26) Ia laloa edia rara dekenai ia kerere lasi, badina be sisiba herevana halasia gaukarana ia reaia lasi. Badina be dahaka unai bamona ia laloa? Badina be iena haroro gaukarana be inai bamona ia gwauraia diba: “Unai totona lau hekwarahi, bona egu goada ibounai lau gaukaralaia noho.” (Kol. 1:29) Do idia karaia lou lasi gaukarana be iseda goada ibounai hegeregerena do ita goadalaia be namo, bena ita danu eda lalona be unai bamona do idia hegeregere!—2 Tim. 2:15.