Oiemu Varavara be Edena Bamona?
1 Ita momo eda varavara haida be hereva momokani lalonai idia noho lasi. Ita ura dikadika ita lalokau henia taudia be ita ida mauri dalana ai do idia raka hebou! Bema idia be iseda ruma bese taudia, edia nega vaira ita laloa momo. Ena be lagani momo lalonai idia ita ha-uraia vadaeni hereva momokani do idia abia dae totona, to namo lasi ita laloa do idia abia dae lasi.
2 Iesu ese haroro gaukarana ia karaia neganai, “ena tadina danu ese idia abidadama henia lasi ia dekenai.” (Ioa. 7:5) Nega ta ena varavara idia laloa ia kavakava. (Mar. 3:21) To unai nega lalonai, Iesu ese ia durudia noho. Gabeai, ena tadina ese hereva momokani idia abia dae. (Kara 1:14) Ena tadina Iamesi be Keristani ekalesia ena du ta ai ia lao. (Gal. 1:18, 19; 2:9) Bema oi ura emu varavara ese hereva momokani do idia abia dae be do oi itaia mai emu moale ida, Basileia ena sivarai namona be idia dekenai do oi gwauraia toho noho, unai kara do oi hadokoa lasi.
3 Oi Hagoadadia, Oi Hametaudia Lasi: Iesu ese taunimanima ia haroro henia neganai, ena hereva ese ia idia kamonai taudia edia lalona ia hagoadaia, idia ia hahisia lasi. (Mat. 11:28, 29) Idia lalo-pararalaia diba lasi herevadia amo ia hametaudia lasi. Emu varavara be hereva momokani ranudia amo do oi hagoadaia totona, idia dekenai ranu kapusi ta do oi henia, ranu baketi ta do oi henia lasi! Sekit naria tauna ta ia gwau: “Anina namona idia havaraia taudia be edia varavara ha-uradia totona, nega ta ta nega kwadogi lalonai idia haroro henidia.” Unai dala amo, dagedage taudia danu be reana do idia nanadaidia matamaia bena gabeai do idia ura hereva momokani ranuna do idia inua.—1 Pet. 2:2; 1 Korinto 3:1, 2 itaia.
4 Keristani taudia momo ese buka o magasin idia kehoa edia murimuri adavadia ese reana do idia ura henia herevana ta ai, bena idia rakatania; unai amo idia hadibadia bona anina namona idia havaraia. Taihu ta be unai bamona ia karaia, bona ena natudia ia stadi henia, ena adavana be ena hereva ia kamonai diba gabuna ai, bona ia do idia durua herevadia ia gwauraia. Nega haida ia nanadaia, ia gwau: “Hari dina egu stadi lalonai inai lau dibaia. Oi ese edena bamona oi laloa?” Gabeai ena adavana ese hereva momokani ia abia dae.
5 Mai Emu Hemataurai ida Oi Haheauka Noho: Pablisa ta ia gwau: “Varavara danu be sibodia edia lalohadai idia dogoatao diba.” Unai dainai, edia lalohadai idia gwauraia hedinarai neganai eiava ita idia noia hereva momokani be idia dekenai do ita herevalaia lasi neganai, namona idia ita kara henia mai eda hemataurai ida. (Had. 3:7; 1 Pet. 3:15) Bema ita haheauka bona ita kara mai eda lalokau ida bona ita kamonai namonamo, idia do ita haroro henia hehuni dalana be do ita tahua diba. Bema ita haheauka, davana namona ita davaria diba. Keristani tauna ta ena sivarai ese unai ia hamomokania. Lagani 20 lalonai iena adavana, kamonai lasi hahinena, ese ia hadikaia, to iena kara ia haheaukalaia. Hahine ese ena kara ia haidaua matamaia neganai, tau ia gwau: “Iehova ese lau ia durua haheauka karana do lau goadalaia dainai lau tanikiu henia bada, badina be ia dainai ia vara gauna be hari lau itaia diba: Egu adavana be mauri dalana ai ia raka matamaia!”
6 Emu varavara be edena bamona? Reana emu Keristani kara namona amo bona idia dainai oi gwauraia guriguridia amo idia do oi veria, “edia lalona do idia giroa, bona Dirava do idia abidadama henia.” —1 Pet. 3:1, 2.