Henanadai Mauana

◼ Iseda tadikaka dekenai dika badana ta ia vara neganai, dahaka ita karaia be namo?

Bema Emu Gabu Dekenai Dika Ia Vara: Gari dainai oi kara kava lasi. Emu hemami biagua, bona mai anina bada gauna​—mauri​—oi laloa bada, kohu oi laloa bada lasi. Tauanina dalanai emu famili taudia ese do idia abia anina bada heduruna oi henidia. Bena elda taudia (emu kongregesen ena eiava kahirakahira ia noho kongregesen ena) dekenai oiemu noho dalana bona gabuna do oi hadibaia. Bema maoromaoro elda taudia eiava sekit naria tauna oi hadibaia diba lasi, brens opesi oi hadibaia toho.

Elda taudia bona hesiai taudia ese gaukara badana idia karaia heduru henia gaukarana lalonai. Bema dika badana, hegeregere lai badana, do ia vara gwauraia dainai taunimanima idia hadibaia, unai tadikaka be do idia itaia iboudiai be dika idia reaia diba gabuna ta ai do idia noho, bona bema nega ia noho, heduru gaudia idia abia bona idia hariharilaia.

Gabeai, buka stadi naria taudia ese famili ibounai edia noho gabuna do idia tahua bona edia noho dalana do idia itaia. Kongregesen gunalaia tauna eiava elda ma ta (eiava grup eiava kongregesen ia naria tadikakana) dekenai ruma bese ibounai edia noho do idia hadibaia, gau iboudiai idia namo neganai danu. Bema ta ese bero ia davaria, unai maduna huaia tadikakadia ese medikol heduru abia dalana do idia hegaegaelaia. Idia ese aniani, dabua, noho gabuna, eiava mauri durua gaudia ma haida do idia hariharilaia. (Ioa. 13:35; Gal. 6:​10) Kongregesen elda taudia ese lauma heduruna bona lalona ena mamina hagoadaia heduruna be kongregesen taudia dekenai do idia henia bona kongregesen heboudia do idia karaia matamaia totona idia hekwarahi. Gau iboudiai idia tahua namonamo murinai, elda edia orea amo elda ta ese bero idia davaria taudia, Kingdom Hall ena dika gaudia, tadikaka edia ruma edia dika gaudia, bona hekwakwanai ma haida danu be sekit naria tauna dekenai do ia hadibaia. Bena sekit naria tauna ese brens opesi do ia rini henia idia vara gaudia ripotilaia totona. Bema heduru program badana do idia karaia be mai anina bada, brens opesi ese unai do ia karaia. Elda eiava hesiai taudia idia noho lasi gabudiai, reana kahirakahira idia noho elda taudia eiava sekit naria tauna ese tadikaka do idia durudia be namo.

Bema Gabu Ma Ta Dekenai Dika Ia Vara: Oiemu guriguri dekenai tadikaka bona taihu oi laloatao. (Iam. 5:​16b) Bema oi ura moni amo do oi durua, oiemu harihari gauna be brens opesi dekenai do oi siaia diba, unuseniai akaun ta ia noho heduru moni atoa totona. Ena adres be inai: IBSA, Box 636 Boroko, NCD 111. (Kara 2:​44, 45; 1 Kor. 16:​1-3; 2 Kor. 9:​5-7; November 1, 1986, Gima Kohorona, rau 28-31 itaia danu.) Gaukara idia naria tadikaka ese idia noia negana sibona ai, dika ia vara gabuna dekenai kohu eiava heduru gaudia oi siaia. Unai amo dala maorona ai heduru do ita henia bona heduru gaudia be dala maorona ai do idia hariharilaia. (1 Kor. 14:40) Mani emu kara brens opesi oi rini henia kava lasi, telefon laini reana idia koua bona dika ia vara gabuna amo idia rini henia diba lasi garina.

Brens opesi ese ia vara gaudia idia laloa namonamo murinai, edia lalona do idia hadaia heduru komiti idia haginia be namo eiava lasi. Maduna idia huaia tadikaka do idia hadibaia. Namona be iboudiai ese unai gaukara idia naria tadikaka edia hereva idia badinaia, tadikaka dekenai mai anina bada heduruna do ita henia diba totona.​—Jehovah’s Witnesses​—Proclaimers of God’s Kingdom, rau 310-​15 itaia.