Witness Lasi Adavadia Durua
1 Bema idia headava tau bona hahine be mai lalo-tamona ida tomadiho momokanina idia abia dae, unai be moale gauna. To, ruma bese momo lalonai, ta sibona ese hereva momokani ia abia dae. Edena dala ai Witness lasi adavadia ita durua bona hagoadaia, ita ida Iehova idia tomadiho henia totona?—1 Tim. 2:1-4.
2 Idia Laloa Gaudia Lalo-pararalaia: Ena be Witness lasi adavadia haida idia dagedage, to nega momo edia hekwakwanai be hereva momokani idia laloa bada lasi eiava kara ta ena anina idia lalo-pararalaia lasi. Reana ta ena hemami be ia idia laloa lasi dainai ia moale lasi eiava ia mama badina iena adavana be lauma gaudia ia laloa bada matamaia. Headava tauna ta ia gwau: “Sibona ruma dekenai lau noho bona egu hemami be taunimanima ibounai ese lau idia negea momokani.” Ma ta ia gwau: “Egu hemami be hegeregere egu adavana bona natudia ese lau idia rakatania vadaeni.” Tatau haida idia laloa dubu ta dainai edia ruma bese idia halusia. (Gima Kohorona, July 1, 1991 gauna, rau 27-30 itaia.) Unai dainai Baibel stadi oi hamatamaia neganai, bema dala ia noho, namona be tau be iena hahine ena stadi dekenai oi boiria danu.
3 Gaukara Hebou: Witness tadikaka ta mai ena adavana be mai edia goada ida idia gaukara hebou headava taudia idia durua hereva momokani dekenai idia vareai totona. Unai taihu be ruma hahine ida stadi ia hamatamaia murinai, unai tadikaka be ena tau ia vadivadi henia. Nega momo ia ese unai tau ida stadi ia hamatamaia diba.
4 Moale Bona Heabidae Karana Hahedinaraia: Kongregesen lalonai ruma bese momo ese tomadiho momokani dekenai idia lalo-tamona lasi ruma besedia idia durua diba. Witness lasi adavana idia vadivadi henia neganai, reana unai ese ia do ia durua ia lalo-parara Iehova ena Witness taudia be hebogahisi Keristani taudia bona ma haida edia namo idia laloa taudia.
5 Nega ta ta, elda taudia ese Witness lasi adavadia durua totona vanegai dahaka idia karaia bona dahaka kara ma haida idia karaia diba unai taudia idia veria mai Iehova dekenai totona idia laloa lou diba.—1 Pet. 3:1.