Hebouhebou Matamatadia Edia Program
1 Lagani 1998 ena dina rua sekit hebouhebou ena sinado be, “Iehova Ena Dina Laloa Noho.” (2 Pet. 3:12) Unai hebou idia karaia iseda karaharaga lalohadaina idia habadaia totona. Lauma dalanai idia noga noho bona kara helagadia idia karaia bona Dirava idia badinaia taudia sibona be ia mai haraga noho ‘Iehova ena dina’ amo do idia roho mauri.—2 Pet. 3:11.
2 Kahana hani herevana, ena sinado be “Ita be Edena Bamona Taudia be Namo,” ese do ia hahedinaraia goevagoeva Iehova ena dina ita laloa noho lalonai, edena bamona kara ita karaia be namo. Pablik tok, “Iehova Ena Dina Ia Mai Kahirakahira Dainai mai Aonega ida Ita Kara,” ese ‘Iehova, kara maoromaoro, bona manau karana tahua’ edia anina do ia hahedinaraia, unai amo ta do ia hegeregere ia roho mauri totona.—Sep. 2:3.
3 Sekit bona distrik naria taudia ese sekit hebouhebou do idia hadokoa inai hagoadaia herevadia rua amo: “Emu Mauri Lalonai Hereva Momokani Oi Atoa Guna, A?” bona “Palani Oi Karaia Neganai Iehova Ena Dina Oi Laloa Noho.” Unai sekit hebouhebou ena program ese ita do ia hagoadaia do ita “laloa maoromaoro bona naria namonamo” totona.—1 Pet. 5:8.
4 Lagani 1998 ena dina tamona hebouhebou matamatana ena sinado be: ‘Sivarai Namona Dainai Kara Ibounai Oi Karaia.’ (1 Kor. 9:23) Program ese ita do ia durua iseda maduna namona, hari inai negai mai anina bada sivaraina ita loalaia maduna unai, ita laloa bada totona. Danu ita do ia hagoadaia Basileia sivarai namona harorolaia gaukarana ita hadokoa lasi totona.—Kara 5:24.
5 Program ese do ia hahedinaraia tiokratik dalanai ita abia diba be ita gaukaralaia namonamo diba iseda hesiai gaukara ita hagugurua totona. Edia mauri idia haidaua edia hesiai gaukara idia habadaia totona taudia haida edia sivarai do ita kamonaia danu.—Filipi 2:22 itaia.
6 Society ese idia abia hidi tadikakana ta ese hereva badana do ia henia, bona do ia hahedinaraia namona be ita hegeregere sivarai namona harorolaia totona. (1 Tes. 2:4) Ita do ia durua edena bamona ita ese Dirava ia gwauraia dalana ita badinaia noho diba, bona Dirava ia gwauraia taravatudia be iseda lalohadai bona kara dekenai ita badinaia diba, bona edena dala ai hahenamo ita abia badina unai ita karaia.
7 Bema ta ia ura Iehova ena dina amo ia roho mauri, bapatiso be mai anina bada. (1 Pet. 3:21) Bema pablisa taudia haida idia ura inai hebouhebou ta dekenai bapatiso idia abia, namona be kongregesen naria tauna idia hamaoroa, bena ia ese unai do ia hegaegaelaia diba.
8 Namona be Iehova ena hagoadaia daladia ita abia dae bona unai gau iboudiai do ita karaia sivarai namona dainai, bena Aramagedono ia do mai lasi neganai, unai gaukara badana do ita haorea. Namona be oi bona emu Baibel stiuden taudia be palani umui karaia lagani 1998 hebouhebou ruaosi dekenai umui lao totona.
This article is unique to PNG.