Iehova ese Siahu Bada Ia Henia
1 Hesiai gaukara helagana ena hahenamo ta—Keristani haroro gaukarana unai—be Iesu ena hahediba taudia iboudiai dekenai idia henia. (Mat. 24:14; 28:19, 20) To ita goevadae lasi dainai bona inai nega ena hekwarahi dainai, nega haida ita laloa ita be hegeregere lasi unai gaukara ita karaia totona.
2 Unai bamona ia vara neganai, aposetolo Paulo ena revareva Korinto ai idia noho horoa Keristani taudia dekenai ese ita ia hagoadaia diba. Ia gwau: ‘Ita be hodu, manoka gaudia sibona bamona do ita noho.’ (2 Kor. 4:7) Paulo ia abia dae: ‘Inai haroro gaukara ita abia dainai . . . , do ita hesiku lasi.’ (2 Kor. 4:1) Momokani, herevana ita be horoa taudia eiava “mamoe idaudia,” ia auka sivarai namona ita harorolaia noho bona ita “hesiku lasi.” “Siahu badana” ia henia Diravana amo heduru ita abia be namo.—Ioa. 10:16; 2 Kor. 4:7b.
3 Witness taudia momo be haroro gaukara karaia goadagoada taudia, herevana dagedage bada eiava gorere bada idia davaria eiava idia ogogami. Namona be ita ibounai ita lalo-parara Iehova ese ita ia durua iseda haroro gaukara ita karaia totona. Namo lasi lalo-manoka eiava gari ese iseda ura haroro gaukara dekenai ia koua, to namona be ‘Lohiabada ena siahu dekena amo do ita siahu, bona Lohiabada ena goada dekena amo do ita goada.’—Ef. 6:10; Aon. 24:10.
4 Dirava Ena Siahu Ita Abia Dalana: Guriguri oi goadalaia, Dirava oi noia ena heduru bona goada oi abia totona. (Roma 12:12; Fil. 4:6, 7) Bena, emu kudouna ibounai ida oi abia dae Iehova ese siahu do ia henia. (Aon. 3:5) Hari inai negai idia noho taudia edia mauri bona kara edia sivarai be iseda magasin lalonai oi duahia, badina idia hahedinaraia momokani Iehova ese hari inai negai ena hesiai taudia ia durua noho, hekwakwanai idia hanaia totona. Kongregesen dekenai idia noho tadikaka oi bamodia, bona hebou lao henia karana rakatania lasi.—Roma 1:11, 12; Heb. 10:24, 25.
5 Namona be ita ibounai ese Iehova ena siahu do ita abia diba dalana ai ita raka. Unai siahu be bada herea bona ia ese ita do ia durua mai anina bada gaukarana, Basileia harorolaia gaukarana unai, do ita hesikulaia lasi totona.