Iehova Ena Tomadiho Henia Gabuna Matauraia
1 Bema ita be vadivadi taudia ta ena ruma dekenai, hemataurai ita hahedinaraia unai ruma tauna ena kohu totona, hegeregere gau ta do ita karaia lasi ita hadikaia totona, bona ruma bese ena heau dalana do ita hadikaia lasi. Ita be Iehova ena vadivadi taudia neganai, namona be hemataurai bada ita hahedinaraia! Namona be ita diba edena bamona do ita kara bema ita be iena ruma dekenai ita noho. (Sal. 15:1; 1 Tim. 3:15) Herevana iseda Keristani hebou be Kingdom Hall ai, ta ena ruma ai, eiava pablik gabuna ta ai ita karaia, nega ibounai ita momo ese iseda tomadiho gabuna dekenai hemataurai ita hahedinaraia, hegeregere ia be Iehova ena ruma bamona, badina “iena hairaina be ataiai momokani, ia ese tanobada bona guba ia hereaia noho.”—Sal. 148:13.
2 Tadikaka haida be hebou gabudia dekenai hemataurai idia hahedinaraia lasi, regerege idia karaia eiava edia kara ma haida amo idia hahedinaraia idia laloa tadikaka ese idia halasia herevadia be anina lasi. Tadikaka bona taihu haida be hebou ia heau noho lalonai, vareai gabuna, mei rumana, eiava Kingdom Hall murimuri ai idia kiki kava. Bema ia bada sisina natuna ta idia rakatania natuna maragina naria totona, nega haida idia ruaosi idia gadara matamaia diba bona hebou ena hereva idia hakala henia namonamo lasi. Idia itaia hebou murinai eregabe taudia haida be Kingdom Hall murimuri ai idia gadara, regerege bada idia karaia, danu idia ese karate bamona gadara idia karaia ta ta dekenai.
3 Hemataurai Lasi Karana Ita Dadaraia Dalana: Iseda tomadiho karana ita laloa bada bona ita laloa ia be gau helagana dainai, ita ura lasi kara haida amo ma haida edia kamonai karana ita hadikaia, hegeregere ta ita hereva henia metaira, aniani ita ania, PK ita ania, pepa ena regena ita karaia, nèga momo mei rumana dekenai ita lao kava, eiava hanaihanai hebou dekenai ita ginidae leiti. Hemataurai bona lalo-namo idia hahedinaraia tama sina ese edia natudia idia naria namonamo idia ese Kingdom Hall eiava buka stadi idia abia rumana ai momoru idia negea kava lasi, bona helai gaudia eiava haba dekenai idia toretore lasi. Edia natudia idia hadibaia danu edena bamona mei rumana idia gaukaralaia do ia goeva noho totona. Bona momokani, ita ibounai do ita abia dae iseda hebou dekenai hemarai karadia, hereva kavakavadia, eiava hevaseha dikadia ita gwauraia lasi.—Ef. 5:4.
4 Bema nega ibounai Keristani hebou edia badina ita laloatao, do ita hamomokania ita bona iseda natudia ese hemataurai do ita hahedinaraia Iehova ena tomadiho gabuna dekenai, ita abia hidi gabuna unai.—Sal. 84:10.