Bema Anina Ia Havaraia, Gaukaralaia!
1 Hanaihanai Iseda Basileia Gaukara pepana ese haroro gaukara totona ita gaukaralaia diba kiki herevadia idauidau ia henia. Unai amo lalohadai matamatadia ita abia edena dala ai taunimanima edia ura ita habadaia Basileia sivaraina dekenai. Reana hua ta ta dekenai oi hekwarahi kiki herevana tamona o ma haida oi dibaia totona. To, pablisa taudia haida idia davaria kiki herevana ta be nega haida sibona idia gaukaralaia murinai, Iseda Basileia Gaukara pepana ma ta ese kiki hereva matamatadia ia hahedinaraia. Momokani, reana tadikaka haida be kiki herevana matamatana do idia dibaia diba lasi bema kiki herevana gunana idia do dibaia namonamo lasi.
2 Momokani, painia taudia bona pablisa taudia tausen momo ese hora momo lalonai haroro gaukara idia karaia. Inai danu, pura haida murinai kongregesen momo ese edia teritori ibounai idia karaia haorea. Unai ia vara neganai, pablisa taudia ese sivarai harorolaia totona hamatamaia herevadia bona lalohadai matamatadia idia abia dae mai moale ida. Unai ese idia ia durua edia gaukara idia hanamoa totona. Danu, unai ese idia ia durua edia haroro gaukara dekenai moale idia abia, anina idia havaraia, bona idia davaria hekwakwanai idauidau idia hanaia diba.
3 Herevana edena hereva oi gaukaralaia, bema oi hegaegaelaia vadaeni kiki herevana ta be taunimanima edia ura ia habadaia namonamo, unai oi gaukaralaia noho! Bema kiki herevana namona be anina ia havaraia, namo lasi oi hadokoa. Ia oi haidaua sisina, hua ena harihari gauna hegeregerena. Iseda Basileia Gaukara pepana ese ia henia heduru herevadia oi duahia lou neganai, oiemu kiki herevana lalonai oi gaukaralaia diba hereva namodia oi tahua.
4 Iseda Basileia Gaukara pepana matamatana oi abia neganai, oi laloatao ia henia kiki herevadia be heduru herevadia sibona. Bema idia oi gaukaralaia diba, unai be namo. To bema kiki herevana ta oi davaria bona oiemu teritori dekenai anina ia havaraia, unai oi gaukaralaia! Gau badana be dala namona ai oiemu haroro gaukara “do oi karaia namonamo,” kara namo taudia oi davaria bona idia oi durua hahediba taudia ai do idia lao totona.—2 Tim. 4:5.