Iehova Ena Witness Taudia—Evanelia Taudia Korikoridia
1 Iesu Keriso ese evanelia gaukara ena maduna ia henia iena hahediba taudia ibounai dekenai, idia ia hamaoroa namona be Basileia ena sivarai namona idia harorolaia. (Mat. 24:14; Kara 10:42) Iena hahediba taudia ginigunadia ese unai idia badinaia Basileia idia herevalaia noho neganai—dubu dekenai sibona lasi, to taunimanima idia noho gabudia bona ruma ta ruma ta dekenai danu. (Kara 5:42; 20:20) Hari, ita Iehova ena Witness taudia, ita hamomokania vadaeni ita be Keristani evanelia taudia korikoridia, tano 232 dekenai Basileia sivaraina ita harorolaia bona idia hanai laganidia toi lalonai hahediba matamata taudia milioni tamona mai kahana be bapatiso idia abia! Dahaka dainai iseda evanelia gaukara ese anina bada ia havaraia?
2 Sivarai Namona ese Ita Ia Hamoalea: Evanelia taudia be sivarai namona ena hereva idia gwauraia o idia harorolaia taudia. Unai dainai, hahenamo namona ita abia, ita be Iehova ena Basileia ita gwauraia—lalo-hekwarahi taudia dekenai ita henia diba sivarai namona korikorina tamona sibona be unai. Ita moale badina ita diba vadaeni do ia vara paradaisona dekenai, guba matamata ese mai kara maoromaoro ida, tanobada matamatana ena abidadama taudia do ia lohiaia. (2 Pet. 3:13, 17) Ita sibona be unai helaro ita abia dae, bona ita ura dikadika ma haida dekenai ita hadibaia.
3 Lalokau Korikorina ese Ita Ia Doria: Evanelia gaukara be hahemauri gaukarana ta. (Roma 1:16) Unai dainai Basileia sivaraina ita harorolaia neganai, moale bada ita abia. Ita be evanelia taudia korikoridia dainai, taunimanima ita lalokau henia, bona unai ese ita ia doria sivarai namona be idia dekenai ita harorolaia—iseda ruma bese taudia, dekena taudia, bamoa taudia, bona taunimanima momo dekenai. Mai eda lalona ibounai ida unai gaukara ita karaia be ma haida ita lalokau henia momokani hahedinaraia dalana namo hereana ta.—1 Tes. 2:8.
4 Dirava Ena Lauma ese Ita Ia Durua: Dirava ena hereva ese ita ia hadibaia Basileia ena uhe hadoa bona dairia gaukarana ita karaia neganai, Iehova ese “unai hadoa gauna ia hatubua.” Ita itaia hari iseda orea lalonai unai hegeregerena ia vara momokani. (1 Kor. 3:5-7) Dirava ena lauma ese ita ia durua iseda evanelia gaukara dekenai bona ia dainai ita kwalimu.—Ioe. 2:28, 29.
5 Timoteo Iharuana 4:5 ena hagoadaia hereva “Sivarai Namona harorolaia gaukara do oi karaia,” bona taunimanima ibounai ita lalokau henia dainai, nega ibounai Basileia ena sivarai namona ita harorolaia. Ita diba Iehova ese iseda gaukara do ia hanamoa noho.