Painia Gaukara—Oi Karaia Diba, A?
1 “Lau laloa lasi gaukara ma ta do lau karaia. Ma gau ta ese lau abia moalena ia havaraia diba lasi.” Daika ese unai ia gwauraia? Ful-taim hesiai gaukara idia karaia Iehova ena Witness taudia handred tausen momo amo ta ese unai ia gwauraia. Mai guriguri ida oi laloa vadaeni bema painia gaukara oi karaia diba, a? Iehova ita gwauhamata henia vadaeni dainai, namona be ita tahua bema Basileia ena sivarai namona herevalaia gaukarana ita habadaia diba. Unai ita karaia totona, tadikaka momo be painia gaukara dainai idia henia henanadai haida mani oi laloa.
HENANADAI 1: “Haida idia gwau tadikaka ibounai be painia gaukara idia karaia diba lasi. Edena bamona lau diba bema lau karaia diba?”
2 Oiemu noho dalana bona emu maduna Baibel ena hahegani hegeregerena be mai anina unai henanadai haerelaia totona. Momo idia gorere eiava edia mauri dalana dainai idia hegeregere lasi hua ta ta ibounai haroro gaukara dekenai hora 90 idia karaia totona. Hegeregere, abidadama taihu momo be Keristani adavadia bona sinadia. Edia noho dalana hegeregerena haroro gaukara idia karaia. Dala ia kehoa neganai, lagani tamona lalonai nega tamona eiava nega haida heduru painia gaukara idia karaia, bona edia hesiai gaukara idia habadaia dainai moale bada idia davaria. (Gal. 6:9) Ena be hari ful-taim painia gaukara idia karaia diba lasi edia noho dalana dainai, to idia ese painia urana idia habadaia bona sivarai namona idia harorolaia goadagoada dainai kongregesen dekenai idia be hahenamo badana.
3 To, ma tadikaka bona taihu momo edia maduna be idia bada momokani lasi dainai, edia tahua gaudia idia haidaua painia gaukara idia karaia totona. Oi be edena bamona? Oi be sikuli oi haorea vadaeni matamata tauna ta, a? Oi be hahine ta bona oiemu tau ese tauanina dalana ai ruma bese ia naria namonamo diba, a? Oi headava vadaeni, to natudia be lasi, a? Emu moni gaukara amo oi ritaea vadaeni, a? Ta be painia gaukara do ia karaia eiava lasi be ia sibona ia abia hidi. Henanadai be inai, Emu mauri dekenai gau haida oi haidaua diba painia gaukara oi karaia totona, a?
4 Satani be iena tanobada ena oromana dikana ia gaukaralaia iseda mauri ia hahonua anina lasi gaudia amo bona eda mauri lalonai sibona eda namo ita tahua totona. Bema iseda lalona ita hadaia ita be tanobada ena lasi totona, Iehova ese ita do ia durua Basileia ita tahua guna noho bona ita karaia diba tiokratik hesiai gaukara idauidau ita tahua bona abia dae totona. Bema emu mauri dalana oi haidaua diba painia gaukara oi karaia totona, namona be unai oi karaia, ani?
HENANADAI 2: “Edena bamona do lau diba bema ful-taim hesiai gaukara lau karaia, moni dalana ai do lau hegeregere?”
5 Momokani, tano momo ai, idia hanaia laganidia lalonai mauri durua gaudia abia totona moni gaukara ena hora pura ta ta iboudiai be idia bada daekau. To, momo be lagani momo lalonai painia gaukara idia karaia, bona Iehova ese idia ia durua noho. Painia gaukara dekenai ita kwalimu totona, abidadama bona sibona eda ura dadaraia karana be gau badana. (Mat. 17:20) Salamo 34:10 ese ita ia hagoadaia ‘Iehova idia kamonai henia taudia, be gau namona ta ai idia dabu lasi.’ Namona be painia gaukara ia hamatamaia tauna be ia diba momokani Iehova ese ia do ia durua. Gabu ibounai dekenai idia noho abidadama painia taudia totona unai ia karaia noho! (Sal. 37:25) Momokani, 2 Tesalonika 3:8, 10 bona 1 Timoteo 5:8 edia hereva hegeregerena, painia taudia idia laloa lasi taunimanima ma haida amo moni dalana ai heduru do idia abia be namo.
6 Namona be painia gaukara idia lalohadailaia taudia be Iesu ena hereva idia badinaia, ia gwau: “Ia be guna do ia helai diho, bona . . . davana do ia laloa.” (Luka 14:28) Unai kara ese aonega ia hahedinaraia. Lagani haida lalonai painia gaukara idia karaia vadaeni taudia oi hereva henia. Idia oi nanadaia Iehova be edena bamona idia ia durua. Emu sekit naria tauna be painia gaukara ia manadalaia tauna, bona oi be ful-taim hesiai gaukara oi karaia namonamo totona oi dekenai mai moale ida heduru herevadia do ia gwauraia.
7 Bema tau ta be sibona ena mauri Iehova ena imana dekenai ia atoa lasi, reana Iesu ena gwauhamata Mataio 6:33 dekenai ena anina korikori do ia mamia lasi. Abidadama painia ta ia gwau: “Lau bona egu bamona be painia gaukarana karaia totona gabu matamatana dekenai ai ginidae neganai, ai be mai emai uma aniani sisina bona bata paketi tamona sibona mo, bona ai be moni lasi. Hanuaboi ai unai aniani ai ania ore, bena ai gwau, ‘Ita be mai eda aniani lasi kerukeru ena.’ Ai gurigurilaia bena ai mahuta. Daba ai, unai gabu ena Witness hahinena ta ia mai ai dekenai, ia gwau, ‘Iehova lau noia painia taudia do ia siaia mai. Hari dina lau be umui do lau bamoa diba, to lauegu ruma be gunika ai dainai, dina tubua ai lau be umui ida do lau aniani, unai dainai inai aniani lau mailaia ita ibounai eda.’ Unai aniani be boromakau vamuna bona uma anianina momo herea.” Unai dainai Iesu ese ita ia hagoadaia ita be ‘mai gari danu ita laloa momo lasi eda noho mauri dekenai’! Bena ia gwau: “Umui daika be ena laloa hekwarahi dekena amo iena mauri ena nega sisina do ia halataia diba, a?”—Mat. 6:25, 27.
8 Tanobada taudia be kohu tahua goadagoada karana idia habadaia noho. Iseda lalona idia ania goadagoada, edia kara do ita tohotohoa totona. To, mai manau ida ful-taim hesiai gaukarana ita laloa bada neganai, unai ese ita ia durua ita moale totona, ena be iseda kohu be momo lasi. (1 Tim. 6:8) Edia mauri lalonai gau idauidau momo idia tahua lasi painia taudia be mai edia nega bada hesiai gaukara idia karaia totona, bona ma haida dekenai hereva momokani idia hadibaia karana amo moale bada idia abia bona lauma dalana ai goada idia abia. Ena be ura gaudia ibounai dadaraia maurina idia badinaia toho lasi, to moni idia laloa namonamo karana ese idia ia durua painia gaukara ena hahenamo idauidau idia moalelaia totona.
9 Bema momokani oi laloa ita be dina gabedia ai ita noho bona inai tanobada dikana ena nega ia ore gwauraia, unai ese lauma dalana ai oi do ia ha-uraia gau haida oi dadaraia nega namodia ibounai lalonai sivarai namona oi harorolaia totona. Bema oiemu moni abia bona gaukaralaia dalana oi tahua lou bona Iehova ena imana dekenai unai oi atoa, reana do oi davaria iena ful-taim hesiai gaukara oi karaia diba. Ena be kohu haida do oi abia diba lasi painia gaukara oi karaia dainai, to Iehova ena hahenamo badana do oi moalelaia.—Sal. 145:16, NW.
HENANADAI 3: “Lau do matamata neganai, badina be dahaka painia gaukara be egu mauri ena gaukara badana ai lau halaoa be namo?”
10 Emu sikuli ena lagani ginigabedia oi karaia noho neganai, vaia oiemu vaira negana do oi laloa. Oiemu ura be do oi noho namo, do oi moale, bona emu mauri be mai ena anina. Sikuli ena guidance tisa taudia be reana oi do idia doria toho lagani momo koledi edukeisen oi karaia mai ena moni bada gaukarana oi abia totona. Emu Keristani lalona oi hadibaia namonamo vadaeni dainai ia ese oi ia hamaoroa, namona be oi hegaegae Iehova oi hesiai henia badabada totona. (Had. 12:1) Reana oi laloa gabeai do oi headava bona natudia do oi havaraia danu. Dahaka do oi karaia?
11 Hari oiemu mauri lalonai oi abia hidi gaudia be emu vaira negana ibounai do idia biagua diba. Bema oi be gwauhamata bona bapatiso Iehova ena Witness tauna ta vadaeni, anina be mai emu lalona ibounai ida Iehova dekenai sibona oi henia vadaeni. (Heb. 10:7) Nega ginigunana dala ia kehoa neganai, hua tamona eiava ma haida lalonai heduru painia gaukara oi karaia toho. Unai ese oi do ia durua regula painia gaukara ena maduna idauidau bona ena moale oi mamia totona, bona reana do oi itaia goevagoeva emu mauri lalonai dahaka oi karaia be namo. Bena, sikuli oi haorea murinai reana oiemu nega oi halusia lasi ful-taim moni gaukara dekenai, to regula painia gaukara oi hamatamaia be namo, ani? Haida idia lalohisihisi badina idia naria ela bona idia buruka sisina painia gaukara idia hamatamaia totona.
12 Oi be matamata tauna dainai, namona be headava lasi maurina tahua daladia, bona ful-taim haroro gaukara ena hahenamo oi moalelaidia. Bema oi ura gabeai do oi headava, regula painia gaukara oi karaia guna be badina namona headava dekenai. Tauanina bona lauma dalanai oi goada oi lao neganai, reana ena lalohadai be oiemu lalohadai hegeregerena adavana ta do oi abia bona do umui abia hidi painia gaukara do umui karaia hebou totona. Idia painia hebou headava taudia haida be sekit gaukara eiava misinari gaukara idia karaia. Unai be moale mauri dalana momokanina!
13 Herevana lagani hida painia gaukara do oi karaia, emu edukeisen do oi hanamoa bona dava bada diba do oi abia, inai tanobada ai ma gaukara ta ese ia karaia diba lasi hegeregerena. Painia gaukara ese sibona eda kara ita biagua karana, gau ibounai hegaegaelaia karana, edena bamona taunimanima ita kara henia dalana, Iehova tabekau henia karana, bona edena bamona iseda haheauka bona hebogahisi karadia ita hanamoa—oi do idia durua maduna badadia oi huaia karadia—ita dekenai ia hadibaia.
14 Taunimanima be edia vaira negana idia daradaralaia. Mauri lalonai gau haida sibona do idia idau lasi, Iehova ese ia gwauhamatalaia gaudia sibona. Emu mauri ibounai be oi vairanai dainai, hari be nega namona oi laloa namonamo edena bamona vaira laganidia lalonai emu mauri do oi gaukaralaia, ani? Painia gaukara ena hahenamo oi laloa namonamo. Painia hesiai gaukara oi abia hidi dainai, gabeai do oi lalohisihisilaia lasi.
HENANADAI 4: “Hora abia totona hanaihanai ia be hekwarahi badana ta, a? Dahaka do ia vara bema hora lau abia lasi?”
15 Regula painia gaukara aplikeisen oi hahonua neganai, namona be inai henanadai oi haerelaia: “Oi be dala oi hegaegaelaia vadaeni, hora 1,000 be lagani ta lalonai oi abia totona, a?” Oi abia totona, namona be dina ta ta ibounai hora toi lalonai oi haroro. Momokani, unai oi karaia totona namona be sediual namona oi badinaia bona sibona oi biagua namonamo. Painia taudia momo be hua haida lalonai idia badinaia diba sediual namona idia karaia.
16 To, Hadibaia Tauna 9:11 be ia hereva momokani, ia gwau: ‘Ita ibounai ese nega dika ita davaria noho, bona inai dika ia vara kava noho.’ Nega haida gorere badana eiava idia vara kava gaudia ma haida dainai painia tauna be ena hora do ia abia lasi. Bema unai hekwakwanai do ia noho daudau lasi bona hesiai laganina ena matamaia kahana ai ia vara, reana unai hora ia abia lou totona ena sediual ia haidaua be namo. To dahaka do ia vara bema hekwakwanai badana ia vara bona hesiai laganina lalonai hua haida sibona idia do noho bona painia tauna be ena hora do ia abia diba lasi?
17 Bema hua haida ai oi gorere eiava oi koua diba lasi gauna dainai emu hora oi abia diba lasi, Kongregesen Hesiai Komiti ena elda ta dekenai oi lao bona emu hekwakwanai oi herevalaia diba. Bema unai elda taudia idia laloa painia gaukara oi karaia noho bona emu hora abia totona do oi lalo-hekwarahilaia lasi be ia hegeregere, idia be unai idia gwauraia diba. Seketere ese unai do ia makaia Kongregesen ena Pablisa Rekod kadi dekenai, oi be hora do oi abia lasi ia hahedinaraia totona. Unai be laga-ani negana lasi, to emu hekwakwanai dainai hebogahisi dalana ta amo oi idia durua.—May 1994 Iseda Basileia Gaukara pepana rau 6, paragraf 7 itaia.
18 Painia gaukara idia manadalaia taudia be hesiai laganina ena matamaia kahana ai edia hora idia habadaia. Edia painia gaukara idia atoa guna, unai dainai idia davaria nega haida anina bada lasi gaudia idia karaia lasi be namo. Bema painia ta ena sediual be namo lasi eiava sibona ia biagua lasi dainai ena sediual ia badinaia lasi bena ena hora ia abia lasi, namona be ia diba unai be iena maduna ena hora ia abia lou totona, bona namo lasi ia laloa elda taudia ese hebogahisi dalana ta amo do idia durua.
19 Nega haida painia ta ena mauri dekenai ia koua diba lasi gaudia idia vara. Ia gorere, eiava ruma bese ena maduna ia bada ia lao, eiava ma gau haida dainai, reana ia davaria nega daudau lalonai ena hora do ia abia diba lasi. Unai neganai, aonega dalana be pablisa ai ia giroa lou bona nega haida heduru painia gaukara ia karaia. Bema ta ena noho dalana dainai ia hegeregere lasi ena hora ia abia noho totona, ia be painia ena lista dekenai ia noho diba lasi.
20 Heduru idia abia be namo taudia totona inai hebogahisi dalana ai hegaegaelaia, bona ai ura inai dala ese ma haida ia hagoadaia lalo-hekwarahi lasi ida painia gaukara idia hamatamaia totona. Reana ia ese ful-taim hesiai gaukara idia karaia taudia ia hagoadaia painia gaukara idia karaia noho totona. Ai ura painia taudia be edia ful-taim hesiai gaukara lalonai idia kwalimu.
HENANADAI 5: “Lau ura gau ta do lau karaia guguru bona lau karaia neganai lau moalelaia. Painia gaukara lalonai unai do lau davaria, a?”
21 Moale korikorina ena badina badana be Iehova tura henia momokani bona ita diba momokani mai abidadama ida ia ita hesiai henia. “Guba ena moale be iena vairanai ia noho dainai,” Iesu ese satauro ena hisihisi ia haheaukalaia. (Heb. 12:2) Dirava ena ura ia karaia dainai ia moale. (Sal. 40:8) Hari inai nega ai, moale korikorina ita abia diba bema iseda mauri ena kara momo be Iehova tomadiho henia karadia. Lauma gaudia ita karaia neganai ita laloa iseda mauri be mai ena anina badina be iseda kudouna ai ita diba ita karaia karadia be maoro. Henia karana amo moale ita abia, bona ita diba, sibona ita henia karana amo, ma haida dekenai Dirava ena tanobada matamatana ai mauri hanaihanai do idia abia dalana ita hadibaia be henia karana hereadaena.—Kara 20:35.
22 Paragraf 1 ai ena hereva ai torea painia tauna ese unai kara ia herevalaia, ia gwau: “Oi stadi henia tauna be Iehova hanamoa karana ia goadalaia oi itaia neganai oi moale bada, moale ma ta ese unai moale ia hanaia diba lasi, ani? Dirava ena Hereva ena siahu dainai taunimanima ia ha-uraia edia mauri idia haidaua Iehova idia hamoalea totona oi itaia neganai, oi moale bona oiemu abidadama ia hagoadaia.” (October 15, 1997, Gima Kohorona, rau 18-23 itaia.) Unai dainai, dahaka ese oi ia hamoalea? Bema do ia doko moalena, tanobada ese ia henia gauna, oi laloa bada lasi, to idia noho daudau anina bada gaukara idauidau oi laloa bada, painia gaukara ese oi dekenai mamina namona do ia henia bona moale korikorina do oi abia.
HENANADAI 6: “Bema mauri hanaihanai be painia gaukara dainai lasi, lau painia eiava lasi be sibona egu ura, ani?”
23 Momokani, do oi painia eiava lasi be sibona emu abia hidi. Iehova sibona be emu mauri dalana ia kota henia diba. (Roma 14:4) Ia ura oi be ia oi hesiai henia mai emu kudouna, souli, lalona, bona goada ibounai ida. (Mar. 12:30; Gal. 6:4, 5) Iehova ese mai moale danu ia henia tauna, bona maumau ida lasi eiava oda dainai lasi ia ia hesiai henia tauna ia lalokau henia. (2 Kor. 9:7; Kol. 3:23) Gau badana be ful-taim hesiai gaukara oi karaia ena badina be Iehova bona emu teritori dekenai idia noho taudia oi lalokau henia. (Mat. 9:36-38; Mar. 12:30, 31) Bema oiemu mamina be unai bamona, painia gaukara oi laloa be namo.
24 Ai ura iniseniai ai torea gaudia ese oi do idia durua painia gaukara do oi karaia diba eiava lasi oi laloa namonamo totona. Emu noho dalana oi haidaua diba regula painia gaukara oi karaia totona, a? Henunai kalenda ta ia noho ena ladana be “Lauegu Pura ta ta Ibounai Painia Gaukara Sediual.” Oi tahua bema oi sibona dekenai ia hegeregere sediual oi torea diba, bona unai ese oi do ia durua pura ta ta ibounai hesiai gaukara ai hora 23 bamona oi karaia totona. Bena, Iehova oi abidadama henia bona tabekau henia momokani. Iena heduru amo oi kwalimu diba! Ia gwauhamata: “Lau ese . . . gau namodia momo herea umui dekenai do lau bubua diho.”—Mal. 3:10.
25 Unai dainai ai henanadai, “Painia gaukara—oi karaia diba, a?” Bema oi gwau diba “Oibe,” dina ta oi abia hidi regula painia gaukara oi hamatamaia haraga totona, bona namona be oi diba momokani Iehova ese oi dekenai moale maurina do ia henia!
[Chart on page 6]
(For fully formatted text, see publication)
Lauegu Pura ta ta Ibounai Painia Gaukara Sediual
MONDAY: Daba haroro gaukara
WEDNESDAY: Daba haroro gaukara
THURSDAY: Daba haroro gaukara
FRIDAY: Daba haroro gaukara
SATURDAY: Daba haroro gaukara
SUNDAY: Daba haroro gaukara
MONDAY: Adorahi haroro gaukara
WEDNESDAY: Adorahi haroro gaukara
THURSDAY: Adorahi haroro gaukara
FRIDAY: Adorahi haroro gaukara
SATURDAY: Adorahi haroro gaukara
SUNDAY: Adorahi haroro gaukara
MONDAY: Hanuaboi haroro gaukara
WEDNESDAY: Hanuaboi haroro gaukara
THURSDAY: Hanuaboi haroro gaukara
FRIDAY: Hanuaboi haroro gaukara
SATURDAY: Hanuaboi haroro gaukara
SUNDAY: Hanuaboi haroro gaukara
Emu pura ena dina ta ta ena sediual oi torea totona pensolo oi gaukaralaia.
Pura ta ta ibounai hora 23 bamona hesiai gaukara lalonai oi torea.
Pura ta ta ai hora iboudiai ____________________
This article is repeated in km 6/02.