Henanadai Mauana
◼ Bema moni gaukara ta lalonai botaia auna, io ta, eiava ma ala-ala gauna ta do ia abia loaloa ma taunimanima haida ia koua totona, Keristani tauna ese unai bamona gaukara ia abia be maoro, a?
1 Tanobada dekenai dagedage karana ia bada ia lao dainai, edia biagudia idia ura gaukara taudia momo ese ipidi o ala-ala gauna idauna ta idia abia loaloa. Banika ena gadi taudia, sekuriti taudia bona pulisi be unai bamona, edia gaukara idia do karaia noho totona.
2 To, Isaia 2:4 ena hereva dainai, Iehova ena Witness taudia kahirakahira ibounai ese unai bamona moni gaukara idia karaia lasi. Ena be unai gaukara be taunimanima (o kohu) naria totona, to Iesu murinai ia raka tauna ese maino ia tahua hanaihanai. (Roma 12:17, 18) Do ia ura inai ia laloa namonamo: Hekwakwanai negana ai, lau ura egu maduna be egu lalona do lau hadaia haraga ta do lau dagedage henia bona reana lau hamasea eiava lasi, a? Lau ura ala-ala gauna do lau gaukaralaia negadia lau davaria, bena reana lau gaukaralaia dainai Iehova vairanai lau be mai egu kerere rara dekenai, a?—Sal. 51:14.
3 Keristani tauna ese ala-ala gauna loalaia lasi gaukarana ia tahua be namo. Edia biagudia idia noia dainai, Witness taudia haida ese ala-ala gauna idia abia loaloa lasi gaukarana ta idia abia. To nega haida, dala be lasi. Bema lasi, Keristani tauna be do ia ura moni gaukara idauna ta ia tahua.
4 Momokani, bema dagedage tauna ese ia hadikaia gwauraia, dagedage ia koua sisina ia heautania totona, Keristani tauna be dagedage tauna ia botaia diba. To, Keristani tauna ta be ala-ala gauna do ia huaia loaloa lasi unai ia karaia totona, bona dagedage dalana dekenai ma tau ta, raskol tauna ta danu, do ia kara henia lasi.
5 Bema tadikaka ta ena moni gaukara dekenai ipidi, io, diba bona peva, botaia auna eiava ala-ala gauna ta ia abia loaloa, elda taudia be do idia hadibaia diba hua 6 idia do ore lasi neganai, ena gaukara do ia haidaua. To, bema hua 6 lalonai unai bamona moni gaukara ia karaia noho, ita gwau diba lasi ia be haheitalai namona. Kongregesen lalonai dagi mai ena gaukara o maduna ta ia karaia noho diba lasi. Elda, hesiai tauna, eiava painia dagina totona ia hegeregere lasi. (1 Tim. 3:2; Tito 1:5, 6)—w84 2/1 rau 15; w73-E 2/15 rau 127, 128 itaia.
This is a repeat of article in km 4/95 “Askim,” unique to PNG. Also repeated in km 10/01.