Buklet Oi Gaukaralaidia Taunimanima Edia Lalona Bona Kudouna Oi Veria Totona
1 Namona be Baibel ena hereva momokani ita herevalaia dalana ese taunimanima edia lalona bona kudouna ia veria. Iesu ese ena kamonai taudia dekenai hereva momokani ia herevalaia neganai, idia laloa gaudia bona edia ura habadaia gaudia ia herevalaia. (Luka 24:17, 27, 32, 45) Iseda hesiai gaukara lalonai anina ita havaraia totona, namona be ita hekwarahi iseda kamonai taudia edia dabu gaudia lauma dalana ai ita diba totona.
2 Buklet be tulu namodia haroro gaukara dekenai ita davaria taudia edia lalona bona kudouna ita veria totona. Namona be ita laloa guna August lalonai ita hariharilaia buklet ta ta edia sivarai ese daika ena lalona do idia veria:
—Dirava ese Ita Ia Laloa Eiava? Moni dekenai idia dabu taudia eiava gau dikana idia davaria taudia ese hisihisi do ia noho lasi negana ena hagoadaia sivaraina do idia abia dae.
—Mauri Ena Anina be Dahaka—Edena Bamona Oi Davaria Diba? Vaira negana idia laloa bada matamata taudia ese namo do idia davaria inai buklet lalonai idia noho Baibel haeredia amo.
—Mauri Hanaihanai Tanobada Dekenai Oi Abia! Laulau bona idia torea hanai lasi siridia momo ese natudia maragidia bona duahiduahi namonamo lasi taudia do idia durua Dirava ena ura idia lalo-pararalaia totona.
—Inai Gavamani ese Paradaiso Do Ia Mailaia. Gavamani dekenai eiava gavamani totona idia gaukara taudia be reana inai sivarai do idia kamonai henia. Ia hahedinaraia edena bamona Dirava ena Basileia ese taunimanima edia hekwakwanai badadia do ia haorea.
—Oiemu Lalokau Tauna ta Ia Mase Neganai. Mase taudia hagoevaia bona guria gaukarana idia karaia taudia momo idia ura inai buklet ena kopi haida idia abia mase tauna ena varavara ese idia itaia totona. Gara gabuna dekenai idia haroro pablisa taudia ese inai buklet idia gaukaralaia mase idia taitailaia taudia idia hagoadaia totona. Taihu rua be gara gabuna ai idia guriguri ruma bese taudia 6 dekenai idia lao. Unai buklet amo hagoadaia sivaraina idia herevalaia dainai, unai dina murinai unai taudia edia sinana ida Baibel stadi idia hamatamaia!
—Toi Tamona Oi Abia Dae be Namo, Eiava? Inai buklet ese Kerisendom ena hahediba herevana badana ia hahedinaraia dalana namona dainai, reana tomadiho ia laloa bada tauna ena lalona do ia veria.
3 Buklet ta ta iboudiai oi diba namonamo, bona emu teritori dekenai oi gaukaralaia dalana namona oi lalohadailaia. Heduru herevadia oi abia totona, July 1998 Iseda Basileia Gaukara pepana ena rau gabena oi itaia. Aiemai ura be Iehova ese emu hekwarahi taunimanima edia lalona bona kudouna oi veria gaukarana dekenai do ia hanamoa.—Mar. 6:34.