Unai Kara Idia Hereaia Karadia Ita Karaia Diba
1 Iesu Keriso be ena haroro gaukara lalonai, idau momokani karadia ia karaia. Hoa dalana ai ia ese taunimanima tausen momo ia ubua, ia ese taunimanima momo edia gorere ia hanamoa, bona mase amo haida ia hatorea isi lou. (Mat. 8:1-17; 14:14-21; Ioa. 11:38-44) Bese ta ena taunimanima ibounai ese iena gaukara idia diba. To, ia do mase lasi hanuaboina ginigabena ai, ia ese ena murinai idia raka taudia mai edia kamonai ia hamaorodia, ia gwau: “Lau dekenai ia abidadama henia tauna ese lau karaia karadia ibounai be do ia karaia, bona inai kara do idia hereaia karadia danu do ia karaia.” (Ioa. 14:12) Edena dala ai ita be unai kara idia “hereaia” karadia do ita karaia diba?
2 Teritori Badana Dekenai Ita Haroro: Iesu be Palestine sibona dekenai ia haroro, to ena hahediba taudia ginigunadia ia hamaorodia idia be “tanobada ena kahana ibounai” dekenai do idia haroro, Iesu ia haroro gabuna dekenai sibona lasi. (Kara 1:8) Ia hamatamaia haroro gaukarana be hari tanobada hegegemadai, tano 232 ai, idia karaia. (Mat. 24:14) Emu kongregesen dekenai idia henia teritori lalonai oi gaukara goadagoada, a?
3 Taunimanima Momo Ita Hereva Henia: Iesu be tanobada dekenai hahediba taudia momo lasi ia rakatania haroro gaukara idia karaia noho totona. To, Pentekoste 33 C.E. ai, edia haroro goadagoada karana dainai, hereva momokani idia abia dae bena bapatiso idia abia taudia ibounai be 3,000 bamona. (Kara 2:1-11, 37-41) “Mauri hanaihanai idia ura kudou-maoro taudia” haboua gaukarana be idia karaia ela bona iseda nega ai, bona hari ita be dina ta ta ai taunimanima 1,000 bamona ita bapatiso henia noho. (Kara 13:48, NW) Oi gaukara goadagoada kudou-maoro taudia oi davaria totona bona idia ura kamonai taudia oi lou henidia totona, a?
4 Lagani Momo Lalonai Ita Haroro: Iesu be lagani toi mai kahana sibona tanobada dekenai ia haroro. Ita momo be lagani momo dekenai ita haroro vadaeni. Herevana lagani ma hida do ita haroro noho, mai moale ida hahediba matamata taudia ta ta ibounai ita durua mauri ena dala dekenai idia raka totona. (Mat. 7:14) Hua ta ta iboudiai oi be Lohiabada ena gaukara oi karaia goadagoada, a?—1 Kor. 15:58.
5 Iesu ese ita ia durua dainai, ita diba momokani ita be ena hahediba taudia korikoridia dainai, ita be iena kara idia hereaia karadia do ita karaia noho.—Mat. 28:19, 20.