Emu Tadikaka Do Oi Dibadia
1 Baibel ia gwau tura korikorina ena kara ese tadikaka ta ena kara ia hereaia. Hanaihanai ia ese ena lalokau bona badinaia karana ia hahedinaraia, bona nega dika ia vara neganai, ia ese ena bamona ia durua. (Aon. 17:17; 18:24) Bema ita hekwarahi ita ta ta ita dibaia bona ita lalokau heheni totona, kongregesen lalonai unai bamona turadia momo herea do ita davaria.—Ioa. 13:35.
2 Hebou vairanai bona murinai, nega namodia idia noho iseda tadikaka ita dibaia namonamo totona. Namona be hebou dekenai oi ginidae haraga bona hebou murinai oi noho sisina daudau, unai amo oi be hebamo namona do oi moalelaia diba, ani? Tadikaka idauidau, edia diba be bada buruka taudia bona matamata taudia eiava hemarai taudia danu, oi tahua idia ida umui herevahereva hebou totona.
3 Herevahereva Oi Hamatamaia: Emu tadikaka oi hanamodia sibona lasi. Haroro gaukara lalonai oi abia ekspiriens ta, magasin matamatana ai ia noho hereva namona, eiava hari sibona ia ore hebouna oi herevalaia karana amo oi be herevahereva oi hamatamaia diba. Kamonai namonamo karana amo oi ese emu tadikaka do oi dibaia namonamo diba, bona idia oi hagoadaia idia dekenai idia vara gaudia bona idia dibaia noho gaudia idia herevalaia totona. Bema idia oi nanadaia edena dala amo Iehova idia dibaia matamaia, reana idia dekenai gau momo do oi dibaia. Haida be edia mauri lalonai abidadama hagoadaia ekspiriens haida idia haheaukalaia vadaeni, to ma haida be hari reana taunimanima momo ese idia laloa diba lasi hekwakwanai idia haheaukalaia noho. Tura korikoridia bamona, unai ita dibaia dainai, ita do ia durua ma haida edia hemami ita laloa bona edia dabu gaudia dekenai ita durudia totona.
4 Hetura Heheni: Ena natuna ia mase murinai, taihu ta ia davaria toreisi lou idia herevalaia Basileia anedia ia abia be auka. Ia gwau: “Nega ta, taihu ta be lau kahirakahira ia helai bona ia itaia lau tai. Lau dekenai ia mai, lau ia rosia, bena lau ida ane orena ia abia. Unai neganai egu lalokau tadikaka bona taihu dekenai be ia bada, bona ai be hebou ai lao henidia dainai lau moale bada, badina be lau diba heduru ai abia gabuna be unuseniai, Kingdom Hall ai.” Iseda tadikaka tura henidia totona, heduru idia abia be namo negadia ai idia ita durua be namo bona idia ita hagoadaia hanaihanai.—Heb. 10:24, 25.
5 Inai tanobada dikana be ia dika ia lao noho neganai, namona be iseda lalona ita hadaia iseda tadikaka do ita dibaia namonamo totona. Ita ta ta ita hagoadaia heheni karana be hahenamo badana ta ita ibounai dekenai.—Roma 1:11‚ 12.