Dokona Ia Mai Kahirakahira Noho Lalonai Haroro Gaukara Ita Habadaia
1 Uma anina gogoa negana be moale negana. Ia be gaukara goada negana danu badina unai nega be mai ena hetoana. Gaukara taudia be edia gaukara dekenai idia lahedo lasi be gau badana.
2 Parabole amo, Iesu ese “tanobada ena dokona” be uma anina gogoa negana ida ia hahegeregerea. (Mat. 13:39) Ita be tanobada ena dina gabediai ita noho, bona “tanobada ibounai dekenai” haroro ena nega be mai ena hetoana. (Mat. 24:14) Tanobada ena dokona be ia mai kahirakahira noho lalonai, iseda kahana unai hesiai gaukara dekenai ita habadaia be namo. Dahaka dainai? Iesu ia gwau: “Uiti ena anina abia negana ia ginidae vadaeni, to utua taudia be momo lasi.”—Mat. 9:37, 38; Roma 12:11.
3 Mai Kara Haraga ida Karaia: Iesu ese ena haroro gaukara namona ia hamatamaia neganai, ia be lagani toi mai kahana sibona ia abia unai gaukara ia haorea totona. Mai ena kara haraga mamina ida ia haroro, ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.”—Luka 4:43.
4 Iesu ese ena hahediba taudia edia lalona ai unai bamona kara haraga urana ia atoa. (Mar. 13:32-37) Unai dainai “dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” (Kara 5:42) Anina bada lasi karadia be gau badadia lasi edia mauri lalodiai. Ena be idia be momo lasi, to idia kwalimu bona “tanobada ibounai dekenai” sivarai namona idia harorolaia.—Kol. 1:23.
5 Hari inai negai, badina badana ta dainai unai bamona kara haraga urana ita abia be namo, badina “gau ibounai edia dokona ena nega be kahirakahira.” (1 Pet. 4:7) Iehova ese inai tanobada dikana ena dokona ena oromana do ia ore dinana bona horana ia makaia vadaeni. (Mat. 24:36) Ia do noho negana lalonai, haroro gaukara do ita karaia ore. Unai dainai ita hekwarahi bada sivarai namona ita halasia taunimanima ma momo dekenai.
6 Dokona ia mai kahirakahira lalonai, bema iseda kahana haroro gaukara ai ita habadaia, mai eda moale ida Iehova do ita hamaoroa, Iesu ia hereva bamona: ‘Ai dekenai gaukara oi henia danu be ai karaia haorea vadaeni.’—Ioa. 17:4.