Tama Sina e—Natudia Dekenai Haheitalai Namona Hahedinaraia
1 Dirava ena Hereva ese ita ia hamaoroa, “kara maoromaoro tauna ena tamana [bona sinana], be do [idia] moale bada.” (Aon. 23:24, 25) Tama sina ese edia natuna dekenai haheitalai namona idia hahedinaraia neganai, unai be hahenamo badana! Brens Komiti tauna ta ese ena tamana bona sinana ia herevalaidia neganai, ia gwau: “Edia mauri ibounai idia henia hereva momokani ena gaukara dekenai, bona lau ura unai bamona lau karaia danu.” Natudia ese edia tama bona sina dekenai, dahaka idia itaia be namo?
2 Hemataurai Heheni Karadia: Natudia dekenai kara namodia hadibaia gaukarana be tama sina edia maduna. Hemataurai karadia do idia diba, hereva amo sibona lasi, to idia itaia bona tohotohoa karadia amo danu. Unai dainai edena kara namodia oi hahedinaraia? “Ekskius,” “mani emu kara,” o “plis,” bona “tanikiu” herevadia oi gwauraia neganai, emui natudia ese unai idia kamonaia, a? Ruma bese lalonai, umui hemataurai heheni, a? Ta ia hereva neganai, oi hakala henia, a? Emui natudia ese umui idia hereva henia neganai, umui kamonaia, a? Unai kara namodia be Kingdom Hall bona ruma dekenai oi hahedinaraia, a?
3 Lauma Dalanai Bona Hesiai Gaukara Dekenai Umui Goada: Lagani 50 mai kahana ful-taim hesiai gaukara ia karaia tadikakana ta ia gwau: “Egu tamana bona sinana be haheitalai namodia hebou lao henia bona haroro gaukarana goadalaia karadia dekenai.” Emui natudia dekenai edena bamona oi hahedinaraia, emu ruma taudia edia lauma dalana oi laloa bada? Dina siri umui herevalaia hebou, a? Ruma bese stadi be hanaihanai umui karaia, a? Emui natudia ese umui idia itaia Baibel bona Society ena buka umui duahia, a? Ruma bese totona oi guriguri neganai, dahaka hereva idia kamonaia? Emui natuna ida lauma gaudia umui herevalaia neganai, hereva momokani bona kongregesen ena namo gaudia umui kikilaia, a? Umui ura bada emui ruma bese ida hebou ibounai umui lao henia bona umui haroro hebou, a?
4 Tama sina e, emui natudia dekenai haheitalai namona umui hahedinaraia. Haheitalai namo hereana umui hahedinaraia, bona unai be edia mauri ibounai lalonai do idia laloatao gauna. Sekit naria tauna ta ena adavana, ena mauri lagani be 70, ia gwau: “Egu Keristani tama sina lalokaudia edia haheitalai namona dainai namo lau do davaria noho. Bona lau guriguri egu ahuna do lau gaukaralaia namonamo ela bona hanaihanai, unai amo do lau hamomokania unai lau laloa bada.”