‘Emui Diari Umui Hahedinaraia’
1 Inai tanobada taudia be tauanina dalanai bona lauma dalanai dibura lalonai idia noho. Hereva momokani ena diari ese dibura karadia, “anina lasi karadia” ia hahedinaraia, unai dala amo ita do idia hamorua diba gaudia ita dadaraia diba. Unai dainai, aposetolo Paulo ese Keristani taudia ia hagoadaia, ia gwau: “Diari taudia bamona do umui noho be namo.”—Efe. 5:8, 11.
2 ‘Diari ese ia havaraia gau namodia’ be tanobada taudia edia dibura amo idia idau. (Efe. 5:9) Unai gau namodia ita havaraia totona, namona be Keristani maurina korikorina ita haheitalaia, bona Iesu ese ia lalo-namo henia taudia bamona ita kara. Danu, namona be mai kudouna ibounai, mai momokani, bona mai lalo-goada ida hereva momokani ita abia dae. Unai gau namodia be iseda dina ta ta maurina bona iseda hesiai gaukara lalonai ita hahedinaraia be namo.
3 Nega Namodia Ibounai Diari Hahedinaraia: Iesu ese ena hahediba taudia ia hamaoroa, ia gwau: ‘Emui diari be taunimanima edia vairanai do umui hahedinaraia.’ (Mat. 5:16) Iesu ita tohotohoa dainai, Dirava ena Basileia bona ena ura ita harorolaia karana amo Iehova ena diari ita hahedinaraia. Taunimanima edia ruma ita vadivadi henia neganai, bona gaukara gabudia ai, sikuli gabudia ai, dekena taudia dekenai, bona nega namodia ibounai dekenai hereva momokani ita gwauraia neganai, diari ita hahedinaraia.—Fil. 2:15.
4 Iesu ia gwau, haida ese diari do idia ura henia lasi. (Ioa. 3:20) Vadaeni, taunimanima momo be “Keriso ena hairaina bona iena Sivarai Namona ena diari” idia ura lasi idia itaia neganai, ita lalo-manoka lasi. (2 Kor. 4:4) Iehova ese taunimanima edia kudouna ia itaia bona ia ura lasi kara maoromaoro idia badinaia lasi taudia be ena taunimanima huanai do idia noho.
5 Iehova ena dala ita badinaia bona lauma diarina ita moalelaia neganai, ma haida dekenai do ita hahedinaraia diba. Bema iseda kara amo idia itaia “mauri ena diari” ita abia, reana idia danu be edia mauri do idia haidaua bona diari halasia taudia ai do idia lao.—Ioa. 8:12.
6 Iseda diari ita hahedinaraia amo, iseda Havaraia Tauna do ita hanamoa bona lalo-momokani taudia ita durua, ia idia diba bona mauri hanaihanai ena helaro idia abia totona. (1 Pet. 2:12) Diari ita abia dainai, namona be ita gaukaralaia bona ma haida ita durua, idia ese lauma dibura amo do idia raka siri dalana idia itaia bona diari ia havaraia karadia do idia karaia.