“Emui Diari Umui Hahedinaraia”
1. Iseda maduna be haida ita durua dahaka idia dibaia totona?
1 Daba ela bona adorahi, dina ena hairai ese Iehova Dirava ia hanamoa. To, Iesu ese ena hahediba taudia ia hamaoroa do idia abia diarina be idau, ia be “mauri ena diari.” (Ioa. 8:12) Unai diari be Iehova amo ita abia harihari gauna ta, bona mai ena maduna badadia haida. Iesu ia gwau: “Taunimanima vairanai emui diari umui hahedinaraia,” unai amo ma haida be namo idia davaria. (Mat. 5:16) Hari inai negai, hereva momokani idia diba lasi taudia huanai ita noho dainai, namona be idia ita durua hereva momokani ena diari idia dibaia totona! Keriso bamona, edena dala ai iseda diari ita hahedinaraia?
2. Iesu be edena dala ai ia hahedinaraia hereva momokani ena diari ita gwauraia hedinarai be mai anina bada?
2 Haroro Gaukara Amo: Iesu be ena nega, goada bona kohu ia gaukaralaia, taunimanima ia durua hereva momokani ena diari idia dibaia totona. Taunimanima edia ruma ai, ariara gabudiai, ororo ai, eiava gabu idauidau ai ia davaria taudia ibounai ia hereva henidia. Ia diba hereva momokani ena diari ese taunimanima do ia durua hanaihanai. (Ioa. 12:46) Iesu be iena hahediba taudia ia hahegaegaea “tanobada ena diari” ai idia lao totona, unai amo momo do idia hadibaia. (Mat. 5:14) Edia diari idia hahedinaraia daladia rua be, edia dekena taudia idia kara namo henia bona haroro gaukara idia karaia.
3. Edena dala ai ita hahedinaraia hereva momokani ena diari ita laloa bada?
3 Dirava ena taunimanima be ‘diari ena natudia bamona idia raka noho’ ena maduna idia laloa bada, bona gabu idauidau ai idia davaria taudia idia haroro henia. (Efe. 5:8) Moni gaukara o sikuli dekenai laga-ani horadia ai, ma haida ese idia itaia diba gabudiai Baibel o buka bona magasin haida ita duahia neganai, unai ese dala do ia kehoa taunimanima ida Baibel ita herevalaia totona. Matamata taihu ta be unai bamona ia karaia dainai Baibel stadi ta ia hamatamaia bona ena sikuli turadia 12 dekenai buka haida ia hariharilaia!
4. Dahaka dainai iseda diari ita hahedinaraia dalana ma ta be kara namodia ita karaia?
4 Kara Namodia Amo: Iseda diari ita hahedinaraia dalana ma ta be dina ta ta ai kara namodia ita karaia. (Efe. 5:9) Gaukara, sikuli, bona taunimanima idia noho gabudia ai, iseda Keristani kara namodia be taunimanima ese idia itaia diba bona unai ese dala ia kehoa Baibel ena hereva momokani ita hadibaia totona. (1 Pet. 2:12) Ena mauri lagani faiv merona ta ena kara namona ese ena tisa ena lalona ia veria dainai, tisa be mero ena tama sina dekenai ia gwau: “Nega ta lau itaia lasi natuna ta be kara maoro ia badinaia goada!” Oibe, iseda haroro gaukara bona kara namodia ese taunimanima edia lalona ia veria “mauri ena diari” idia badinaia totona, bona unai ese iseda Dirava ia hanamoa.