Oi “Ura” Ma Haida Oi Durua, A?
1 Iesu ese taunimanima ia laloa bada. Lepera tauna ese heduru totona Iesu ia noia neganai, Iesu ese unai tauna ena kopina dekenai ena imana ia atoa, bona ia gwau: “Lau ura. Hari oi goeva.” (Mar. 1:40-42) Edena dala idauidau ai, ita ese Iesu ena lalohadai ma haida durua karana dekenai, ita tohotohoa diba?
2 Kamonai Taudia: Kamonai taudia be Iehova tomadiho henia taudia ai idia lao lalonai, kongregesen taudia ta ta be mai edia gaukara. Kamonai matamata taudia be hebou dekenai idia mai neganai, idia oi hedavari henia bona oi dibaia toho. Idia oi hagoadaia daladia oi tahua. Idia henia haere dainai idia oi hanamoa. Edia mauri lalonai Baibel ena hakaua herevadia idia badinaia toho dainai idia oi hanamoa. Idia oi durua, kongregesen lalonai turana korikoridia do idia abia diba idia itaia totona.
3 Keristani Tadikaka: Iseda Keristani tadikaka be dala idauidau ai ita durua bada herea be namo. (Gal. 6:10) Momo be gorere dainai idia hekwarahi. Idia oi vadivadi henia bona oi hagoadaia neganai, hebamo namona idia abia bona reana gaukara haida amo idia oi durua diba. Haida ese edia mauri lalonai hekwakwanai ma haida idia haheaukalaia. Edia hekwakwanai oi kamonai bona idia oi hagoadaia, unai amo oi hahedinaraia edia namo oi tahua. (1 Tes. 5:14) Elda taudia ese edia maduna idia huaia lalonai, idia ida ita gaukara hebou be gau badana danu. (Heb. 13:17) Ura bada ita hahedinaraia bona heduru ita henia neganai, iseda Keristani tadikaka ita “durua bada herea.”—Kol. 4:11.
4 Ruma Bese Taudia: Namona be ruma bese lalonai danu Iesu ena kara ita tohotohoa. Tama sina ese edia natudia edia namo idia tahua dainai ‘idia dekenai Lohiabada ena hadibaia hereva idia hadibaia.’ (Efe. 6:4) Natudia ese famili stadi, kongregesen hebou, bona haroro gaukara totona idia hegaegae haraga neganai, edia maduna idia huaia. Idia bada vadaeni natudia ese Iesu ena kara idia tohotohoa diba, bema edia tama sina ese buruka dainai idia davaria hekwakwanai lalonai mai hebogahisi ida idia durudia. Unai bona dala ma haida ai, ita ibounai ese eda ruma bese lalonai “Dirava do ita hamoalea.”—1 Tim. 5:4.
5 Ma haida ita durua karana amo Iesu ita tohotohoa neganai, hekwakwanai ita hamaragia bona iseda ruma bese bona kongregesen lalonai lalo-tamona ita havaraia diba. To gau badana be, unai amo “bogahisihisi bona durua ibounai ia henia Diravana” Iehova ita hanamoa.—2 Kor. 1:3.