Heduru Ita Henia Diba, A?
1 Nega ibounai Iehova be dala idauidau ai ena abidadama hesiai taudia ia durua. (2 Siv. 16:9; Isa. 41:10, 13) Isaia ese ia hahedinaraia Iehova be mamoe naria tauna namona bamona, ia gwau: “Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao. Bona edia sinadia bona rogorogo gaudia, be ia ese metairametaira do ia hakaudia lao.” (Isa. 40:11) Iehova ena lalokau karadia, ita tohotohoa diba daladia haida unai, ita laloa be namo.
2 Kamonai Matamata Taudia Durua: Kamonai matamata taudia dekenai heduru ita henia diba bema idia ita boiria iseda hebamo namona idia moalelaia totona. (Aon. 13:20) Tadikaka ta be kongrigeisen taudia ia bamoa matamaia neganai, ma haida ese ia idia durua dalana ia laloa lou, ia gwau: “Nega haida, ruma bese ta be edia ruma bese stadi lalonai lau idia boiria danu. Lau goada lau lao neganai, headava painia tau bona hahine be hanaihanai lau idia boiria dina ta ibounai lalonai ai haroro totona. Nega ibounai lauma gaudia ai herevalaia hebou.” Ma ia gwau: “Keristani tauna ta ai lau do lao lasi neganai, Friday bona Saturday hanuaboi lalodiai lau be bamoa taudia lau tahua. To tadikaka lau bamoa neganai, unai be egu dabu gauna ia hagugurua.” Kongrigeisen taudia ese lalokau dalana amo unai tadikaka idia durua dainai, iena abidadama ia goada bona ia auka momokani, bona hari ia be Betele ena ruma bese tauna ta.—Kol. 2:6, 7.
3 Durua Heheni: Eda tadikaka edia noho dalana ia auka neganai, dala ita tahua heduru ita henia totona. Bema pablisa ta ia gorere, dala oi karaia diba ia ida telefon haroro umui karaia eiava oi noia Baibel stadi ta umui itaia hebou, reana stiuden tauna oi hakaua mai gorere pablisa ena ruma ai stadi umui karaia totona, a? Tama sina mai edia natudia maragidia ida be haroro gaukara idia karaia neganai, oiemu heduru idia moalelaia, a? Lou henia eiava haroro daladia ma haida idia karaia totona idia gari taudia ese emu heduru idia abia be namo, a? Eda tadikaka lalokau henia karana ese ita do ia durua dala idauidau ai idia ita hagoadaia totona.—Roma 14:19.
4 Iehova ese ena hesiai taudia ia lalokau henia karadia ita tohotohoa neganai, ta ta ita hagoadaia, kongrigeisen taudia ita durua idia lalokau heheni bona iseda guba Tamana ita hanamoa.—Efe. 4:16.